Сорав – жавап

 

 

– Палестинада болуп турагъан гьаллар барыбызны да талчыкъдыра. Биз, дагъыстанлылар, олагъа не кёмек этип болабыз?

 

– Дагъыстанны Башчысы Сергей Меликовну Телеграм-каналында язылгъан кюйде, Палестина бойгъа йибермек учун Россияда 100 тон мал жыйылып битген. Шону 30 тонун дагъыстанлылар жыйгъан. 20-нчы ноябрде шо рагьмулукъ кёмек МЧС-ни самолёту булан  палестиналылар учун етишдирилип де битген. Тезде дагъы да кёмек йиберме гёз алгъа тутула.

«Бугюн биз Палестинаны халкъына 30 тон рагьмулукъ кёмек йибердик. Яхшы амаллы, даим де кёмек къолун узатагъан дагъыстанлылар булан мен оьктеммен. Бизге ортакъ къайгъыдагъы адамлагъа этилеген кёмегибиз биринчилей тюгюл, Украина бойдагъы хас асгер гьаракатдагъылагъа, Тюркияда ва Сирияда болгъан ер тербенивлерден сонггъу балагьны алдын алывгъа да къол ялгъагъансыз, бугюн буса тарчыкъда турагъан Палестинаны Газа деген бёлюгюндегилени де якълайбыз…», – деп яза оьзюню ТГ-каналында Дагъыс­танны Башчысы Сергей Меликов.

Сергей Меликов палестиналы 200 къачгъанланы къабул этме гьазирлигин де билдирген.

 

* * *

– Уьйленмек айрыча шат мюгьлет, тек кёп яшамай айрылагъанлар да бола. Шоланы санаву юрюлеми?

 

– Артдагъы йылларда Дагъыстанда да айрылывлар кёп бола бара Артдагъы берилишде гьисабын юрютеген центрны ёлбашчысы  Ханлар Пашабеков шулай маълуматланы гелтирип сёйледи.

Дагъыстанда айрылывлар артып тура, артдагъы 9 айны алсакъ да, ЗАГС-ларда 15082 агьлю айрылгъан. 2021-нчи йылда айрылагъанланы санаву шо вакътини ичинде 5948 буса, бу йыл уьч керенге артгъан. 2022-нчи йылда оланы санаву 14210 эди.

 

* * *

– Бу йыл август айда болгъан атылывдан сонг кёп санавдагъы АЗС-лени иши токъталды. Шоланы бирлери ишлеме башлагъан дей…

 

– 15-нчи августда Магьачкъаланы Къараман боюндагъы АЗС-ни янында болгъан атылывдан сонг, Дагъыстандагъы бары да  заправкаланы тергев оьтгерилди. Шолардан 237-сини иши токътатылды. Сергей Меликов артда оьтгерген генгешде  шо масъаланы янгыдан гётерди. Ол айтгъан кюйде, АЗС-лени кёплери ишлеме башлагъан.

Олар гёрсетилген тетиклерин тайдыргъан яда шолар судну гёрсетивю чыкъгъанча да къарамай ишин башлагъан, – дей Дагъыстанны Башчысы. – Эгер де шолай буса, жаваплы къуллукъдагъылар оьзлени тувра борчларына осал янашагъанны исбатлай.

Эгер де август айдагъы гьал такрарланса, кёп къабатлы адамлар яшайгъан уьйдегилеге болажакъ зарал бир-нече керенге артарны айта туруп, тезликде тергеп оьзюне билдирмекни тапшургъан.

 

* * *

– Бу йыл алда болмагъандайкёп ашлыкъ жыйылгъан дей эди, тек тюкенлердеги экмекни багьасы тюшмей…

 

– Россияны юрт хозяйство министерлигини сайтында айтылагъан кюйде, ашлыкъланы къайтарыв тамамланмагъан. Ноябрни башына ерли 147 миллион тон ашлыкъ алынып битген. Шо ишни созулагъаны да – тарыкълы техника етишмейгенликден. Гележек 2 айны ичинде россиялы ва бероруссиялы заводлардан юрт хозяйствону юрютегенлеге 6 минг тракторлар ва олагъа тиркев алатлар берилежек. Шоланы багьасыны бир пайын пачалыкъ тёлежек. Иш арив болуп гетсе, халкъны сан янлы ашамлыкъ маллар булан таъмин этив давам этилежек ва шоланы багьасы да тёбенлешмек бар.

 

* * *

– Уланым бир йылларда Армениядан машинлер гелтирип сатып турду, гьали гюмрюк гьакълар артгъан деп ишин токътатгъан. Алышынгъан зат бармы?

 

– Янгылыкълар ёкъ. Эгер де сатывгъа гелтире бусанг, гюмрюк гьакъны толу кюйде тёлеме герек. Оьзюнге деп гелтире бусанг, 1-нчи августдан берли енгилликлер бар:  3 йыл болагъан машинлеге тёленеген гьакъ – 3400 манат, 3-ден оьрдеги машинлеге – 5200 манат.

 

Онгаргъан Гебек  КЪОНАКЪБИЕВ.

 

Авторизация
*
*
Регистрация
*
*
*
Согласны с условиями сайта?
Генерация пароля