Магьачкъаланы Альбёрюгент юртунда ерлешген 20 номерли орта школасында май айны 19-нда Россияны Игити Тулпар МУСАЛАЕВНИ аты къоюлагъангъа байлавлу чара оьтгерилди. Шо гюн школаны абзарында Игитни мемориал эсделиги де ачылды. Ортакъчылыкъ этмеге къонакълар да чакъырылгъан эди. Школаны муаллим коллективи ва охувчу яшлар оьтгерген эсделик чара охув ожакъны абзарындан башланды, актовый залда узатылды ва игит улан гёмюлген къабургъа чечеклер салыв булан тамамланды.
Чыгъып сёйлеген Магьачкъала шагьар администрациясыны башчысыны биринчи заместители Мавлидин Маликов, Билим беривню Магьачкъала шагьар управлениесини начальнигини борчларын заманлыкъгъа кютеген Марат Ибрагьимов, Магьачкъаланы Совет районуну башчысы Арсен Айдиев, запасдагъы полковник Муртуз Идрисов, Дагъыстан Республикада къатынгишилерини союзуну председатели Интизар Мамутаева Россияны Игити Тулпар Мусалаевни атына патриот ругь къатнашгъан таъсирли сёзлер айтдылар. Оланы сёйлевлеринде булай уьлгюлю уланны тарбиялама болгъан ата-ананы атына да кёп йылы сёзлер айтылды. Оьздемир ва Рукъуят гелгенлеге оьзлени баракалласын билдирди ва уланыны аты школагъа къоюлгъаны булан оьктем болагъанын эсгерди.
Школаны уллу актовый залына жыйылгъанлар охувчу яшлар булан гьазирлеген программаны барышында Ватанны сюйме де, огъар абур этме де герекли ойлар, пикрулар тувулунагъандан къайры да эли учун яшавундан айрылгъан Россияны Игити Тулпар Мусалаевни ярыкъ келпети де суратлана эди.
Тулпар Мусалаевни ата-анасы – яхсайлылар. Уллатасы ва улланасы Альбёрюгентдеги къабурларда гёмюлген. Тулпарны да эсделик ери шонда болмагъа тийишли болгъандыр. Юрт къабурлагъа гёмюлген игит уланны аты юрт школагъа берилмек де – халкъ арада яшайгъан арив къылыкъланы бириси. Нечик алай да, ону аты, гёрсетген гьюнери, къоччакълыгъы яш наслугъа да уьлгю болуп токътажакъ.
Россияны асгер гючлерини майору Мусалаевге Игит ат нечик берилгенни гьакъында бизин газетде де, оьзге тюрлю маълумат къуралларда да язылды. Ол, гертиден де, Россияда, олай да Дагъыстанда яш наслуну патриот ругьда тарбияламакъ учун атларын эсгерме тюшеген уьлгюлю адамларыбызны бириси.
Игитни къабурундагъы сынташындагъы бир байт шиъруну да уллу маънасы бар. Онда булай язылгъан.
Эл намусну кютюп лап да авурун,
Кёкге чюйдюнг халкъыбызны абурун.
Нече наслу сени эсге алажакъ,
Игит атынг тарихлерде къалажакъ.
Гертиден де, таъсирли сёзлер. Олай маъналы сёзлер Россияны Игити Тулпар Мусалаевни атына дагъы да кёп айтылажакъгъа шек ёкъ. Ону эсделиги даимге сакъланма тарыкъ. Бугюн бу школагъа ону аты къоюлгъаны да шо уллу ва умпагьатлы эсделикни юрюлежеги булан байлавлу.
Набиюлла МАГЬАММАТОВ.
