– Шо ярышларда шахмат оюн булан машгъул болагъан 70 адам ортакъчылыкъ этди. Ярышларда ортакъчылыкъ этген дагъыстанлыланы арасында Руслан Мусалов яхшы натижалагъа етишмеге бажарды. Ол шо ярышларда 6, 5 очко къазанып, 5-нчи ерге ес болду.
Оьтгерилген ярышларда биринчи ерни Ставрополь крайдан гелген Завур Текеев алды. Дагъыстандан баргъан ярышланы оьзге ортакъчылары – Магьачкъала шагьарны шахмат федерациясыны ёлбашчысы Агьмат Хасболатов ва Тата Бариев 4, 5 очко тюгюл къазанмагъа болмады, – дей Ж.Жакъаев.
Ону сёзлерине гёре, ярышланы ахырынчы уьчюнчю тирети август айны 29-ндан тутуп, 30-на ерли оьтгерилежек. Ону гьасиллерине гёре, олай да ондан алда юрюлген ярышланы эки де тиретини натижаларын гьисапгъа алып, лап яхшы 16 шахматист Темиркъазыкъ-Кавказ федерал округуну кубогуна ес болмакъ учун юрюлежек финал оьчешивлерде ортакъчылыкъ этежек. Ярышланы финал тирети, алданокъ гёз алгъа тутулагъаны йимик, сентябр айны ахырында, октябр айны башында Грозный шагьарда оьтгерилежек.
Ж. Жакъаев айтагъаны йимик, ярышланы уьчюнчю тиретинде ол оьзю де ортакъчылыкъ этежек.
– Мен ярышланы Теберда шагьарда юрюлген экинчи тиретинде ортакъчылыкъ этмедим. Оьрде эсгерилген кубокгъа ес болмакъ учун июн айны ахырында Владикавказда юрюлеген ярышланы биринчи тиретинде уьчюнчю ерге ес болдум,– деп айрыча эсгерди Ж. Жакъаев.
Шондан къайры да, август айны 9-ндан 17-сине ерли Магьачкъала шагьарда Анатолий Карповну атындагъы Шахматланы уьюнде шахмат оюндан Дагъыстанны чемпионаты оьтгерилежек.
Насрулла БАЙБОЛАТОВ.
