Шахмат оюнлагъа шо гюн мунда республиканы кёп санавдагъы юртларындан ва шагьарларындан гелип, 80-ден де артыкъ адам къуршалды. Оланы арасында спортну шо журасындан СКФО-ну федерациясыны вице-президенти Ж. Жакъаев, Дагъыстан Республиканы шахмат федерациясыны  директору М. Магьамматов, шо оюнланы халкъара оьлчевдеги усталары Р. Мусалов, Д. Абрамов ва кёп оьзгелер бар эди.

Турнир Дагъыстанны федерациясыны ва «Буйнакск район» деген муниципал къурулувуну администрациясыны сиптечилиги булан оьтдю.

Шахмат оюнлар швейцарский системагъа гёре юрюлдю.  Жыйылгъанлар, биринчи турдан башлап, 40 столда шахмат ойнама гиришдилер. Кубокну алмакъ учун олар бары да гьюнерин салып ойнады. Натижада, Магьачкъаладан гелгенлер: шахмат оюнланы халкъара гроссмейстери Ж. Жакъаев, ФИДЕ-ни мастери Р. Мусалов лап да кёп очколар булан алдынлы ерлени алдылар. Олардан сонг уьчюнчю ер Магьачкъаладан гелген бирдагъы шахматист Къ. Къардашевге тюшдю.

Бу оюнларда бизин райондагъы шахматистлер де актив кюйде ортакъчылыкъ этди. Савлай алгъанда, Буйнакск районну атындан 13 адам ойнады. Олардан Оьр Жюнгютей юртдан гелген Ш. Алиев, къызланы арасындан буса А. Абакарова, Каспийскиден Гь. Ниъматуллаев, яшлардан – Новолак райондан гелген Ж. Шейхалиев яхшы ойнады.

Турнирде алдынлыкъны алгъанлагъа «Буйнакск район» деген муниципал къурулувуну ва Дагъыстанны шахмат федерациясыны ёлбашчыларыны атындан дипломлар, медаллар ва акъча савгъатлар берилди.

Буйнакск районда шахмат оюнлардан булай ярышланы гьар йыл оьтгермеге гёз алгъа тутулгъан.

 

 

Д. СОЛТАНОВ,

Буйнакск райондагъы яшланы

 спорт школасыны директору.