Тюменге гелгинче «Анжи» самолёт булан Россияны Дагъыстангъа чинк де йыракъ шагьары Владивостокда ойнап гелди. Ондагъы заманны буса москва заманындан сегиз сагьат башгъалыгъы бар. Футболистлеге тюгюл, спорт булан машгъул болмайгъан адамгъа да Владивостокгъа учуп барып, къайтып гелмеге де бек къыйын. Шонда футбол да ойнап гелген сонг, уьч гюн де гетмейли, адамны белине гелеген къар явгъан Тюменге де учуп, дагъы да бир оюнну оьтгерип, ерли команданы да утгъан саялы, бизин футболистлеге айрыча разилик билдирме ярай.
Токътамайлы къар явагъан саялы, Тюменде оьтгерилеген оюн токъташдырылгъан замандан эки сагьат ярымдан сонг башланды. Майдандагъы искусственный газон бузлап, бек тайгъакъ экени, олай да сувукълукъ «Анжиге» оьзюню оюнун гёрсетмеге нечакъы да пуршавлукъ этди. Оюнну башын майданны есилери, сувукълукъгъа уьйренген халкъ экенге саялы буса ярай, къужурлу башлады. Бизин къапучу Кержаков бек къыйын эки топну гери ургъан сонг, якълавчуларыбыз Тюменни чапгъынчыларыны оюнуна агьамиятлы янашагъан болду. Тек «Анжи» буз майданда болса да, есилерден гючлю экенин узакъ къалмай гёрсетди. Оюнну 26- нчы минутунда, Аравинни пасындан пайдаланып, Янник Боли яхшы гьиллалыкъ этип, Самойловну къапусуна биринчи топну гийирди.
Оюн шо санав булан да тамамланды. Тюзю, судья экинчи таймда офсайд деп, бизин ярым якълавчу Комков гийирген тап-таза голну санамады. Бу айны 25-нде буса «Анжи» Россияны кубогуна ойналагъан оюнда оьзюню майданында екатеринбурглу «Уралны» къабул этме гьазирлик гёрюп тура.
Шарапутдин КИШИЕВ.
СУРАТДА: Янник Боли гол гийирген сонг.
