Гюйдюрмес районну Борагъан юртунда авур атлетикадан СССР-ни 1965-нчи йылдагъы спартакиадасыны чемпиону Самавдин Баракаевни савгъатларына пауэрлифтингде ачыкъ турнири яшланы ва оьрюм яшланы арасында оьтгерилген.
Белгили атлетни савгъатларын къазанмакъ учунгъу ярышларда Урус-Мартандан, Шатойдан, Ойсхар, Червлённая, Мескеты юртлардан, Хасавюрт ва Гюйдюрмес шагьарлардан яш атлетлер ортакъчылыкъ этдилер. Ону оьтгерме сиптечилик этген ярышланы баш судьясы ва белгили атлет Шарапудин Мамаев булан хабарлайбыз.
– Бизин юртлу айтылгъан Самавдин Баракаевни аты алдагъы савлай СССР-ге белгили эди. Ол ЧИАССР-ни кёп керен чемпиону болгъан. СССР-ни спортуну устасы. Биз ону гьюрметине уллу турнир оьтгердик. Ярышланы къурумлу ва къужурлу оьтгерме къаст этдик. Ятып штанганы гётеривде яш атлетлер яхшы гючюн гёрсетдилер. Бизин Борагъан юртну атлетлери ярышларда алты биринчи ерни къазандылар. Айтагъаным, Борагъан юртда гючлю яшлар гьаман да болгъан. Спортну бу журасын бизин юртдагъы яшёрюмлер кёп сюе. Мычыгъыш Республикада бизин юрт гьар заман алдагъы ерлерде. Белгили атлетни биринчи савгъатларын У. Дидимов (40 кило, Борагъан), А. Гьакимов (44 кило, Борагъан), А Хачапов (48 кило, Борагъан), Р. Абдуллаев (53 кило, Борагъан), Р. Ирисханов (59 кило, Червлённая), А. Нохаев (66 кило, Борагъан), З. Дудуев (74 кило, Урус-Мартан), М. Сербиев (83 кило, Урус-Мартан), А. Бачаев (93 кило, Урус-Мартан), Р. Хункерханов (105 кило, Борагъан), И. Хусаинов (120 кило, Шатой), М. Эдилханов (120 килодан оьрде Ойсхар) къазандылар, – деди ол.
– Аллагь рази болсун Шарапудин Мамаевге шу ярышланы мени савгъатыма оьтгерген саялы. Бек арив гёрдюм. Борагъанлы уланлар утгъанны гёрюп дагъы да бек сююндюм, –деди Самавдин Баракаев.
Суратда: чемпион Р.Хункерханов.
Автор чыгъаргъан
