Россияны чебер академиясыны президиуму Россияны ат къазангъан художниги, сурат этивню профессору, Дагъыстанны Пачалыкъ савгъатыны эки керен лауреаты Абдулзагьир Мусаевни академик этип айыргъан. 2009-нчу йыл А. Мусаев академияны алтын медалы булан савгъатлангъан. 2012-нчи йылдан берли академияны член-корреспонденти. Гьали буса ол эсгерилген академияны Дагъыстандан чыкъгъан биринчи академиги.
Ондан къайры да, Абдулзагьир Мусаев − Дагъыстанда чебер сурат этивню биринчи профессору. Ол Дагъыстан педагогика университетни чебер-графика факультетинде сурат инчесаният бёлюкню ачмакъны сиптечиси болгъан. Бу бёлюкде студентлер чебер сурат этивге, графикагъа, скульптор касбугъа уьйрене.
Академик Абдулзагьир Мусаев этген сексенден де артыкъ суратлар Москвада, Санкт-Петербургда ва Россияны башгъа шагьарларында выставкалагъа салына. Японияны, Италияны, Германияны, Тюркияны, Белгияны, Израйилни вакиллерини коллекцияларында сакълана.
Бизин художник оьзю этген суратлар булан Россияны шагьарларындан ва эсгерилген пачалыкълардан къайры, Японияны, Тюркияны, Украинаны, Болгарияны, Эстонияны, Азербайжанны 90-гъа ювукъ выставкаларында ортакъчылыкъ этген.
Академикни хас гийимин академияны президенти Зураб Церетели тапшургъан.
