Россияны чемпионатында ойналагъан краснодарлы «Кубань» булангъы ахырынчы оюнну «Анжи» утгъан буса, къаравчулар команданы алдынгъы «айыпларындан» гечип къойма да гьазир эди. Тек ...
Бизинкилер оюнну яман да башламады, къоркъунчлу мюгьлетлер де болду.., оланы чы къолдан чыгъарагъаны бизинкилер муна бу еттинчи оюн (ахырынчы етти оюнну ичинде «Анжи» башгъа команданы къапусуна бир гол да гийирип болмагъан).
Экинчи таймда буса «Анжи» оюнну тизгинлерин оьзюню къолундан чы­гъармай биринчи таймдан хыйлы гючлю ойнады, тек нетерсен, тизгинлени тутуп тургъан булан футбол оюнда очколар бермей, голлар да гийирме тюше.
Оюнну лап да ахырында судья «Кубанны» къапусуна он бир метрлик пенальти гёрсетди. Бизин Максимов буса, тез барып топну къолуна алып, пенальтини урма сюеген не Сердеровгъа, не Тагьирбековгъа, не Григалавагъа, не де Жусилейге бермей, оьзю штрафнойну урма токъташды... Сонг буса, гючю бар чакъы уруп, топну бийикден учуртуп йиберди... Мен футболгъа къарайгъаным элли йылгъа ювукъ бола, нени де гёргенмен, кёп къолайсыз урулгъан пенальтилени де гёргенмен, тек шонча да шолай къолайсыз урулгъан пенальтини экинчи лигада тюгюл, академиядагъы гиччи яшлар уруп да гёрмегенмен.
Шолайлыкъ булан, бизин «Анжи» Россияны чемпионатында лап да гючлю антирекорд салды. Гьали болгъунча бизин чемпионатда он тогъуз оюн да ойнап, бир керен де утмагъан команда болмагъан.
Команданы еси Сулейман Керимов айтагъан кюйде, къышда командагъа кёп янгы футболистлер гележек.
10-нчу декабрде шо оюнда травма алгъан Али Гьажибековну биз уьюне гёрме бардыкъ.

Шарабутдин Кишиев.
Суратда: А. Гьажибековну гёрме баргъан вакъти.