Дагъыстан Республиканы Башчысы Сергей Меликов ишчи сапар булан Хасавюртда болгъан. Ол бу шагьарда январ айны 8-нде ягъарлыкъ газ атылывну натижасында хатабалагьгъа тарыгъан уьйде яшайгъан адамлар булан ёлукъгъан. Оланы кёплери оьзлер турагъан квартирлени къоюп чыкъма борчлу болгъан.

Шогъар гёре Дагъыстан Республиканы Прокуратурасы, Ахтарыв комитети уголовный иш ачгъан. Оьлгенлер ёкъ, «Дагъыстан» маълумат агентлиги билдиреген кюйде, больницагъа тюшгенлерден бир къатын ва гиччи яш да болгъан. Республиканы Башчысыны буйругъу булан зарал болгъанлагъа кёмек этилген, заманлыкъгъа яшамакъ учун ерли къонакъ уьюнден ерлер гёрсетилген.

Сергей Меликов Хасавюртда хатабалагьгъа тарыгъанланы бирлери булан оьзю ёлугъуп, оланы арзларына тынглагъан ва тийишли кёмеклер этилежегин англатгъан: «Англайман, сизин учун янгы йыл арив башланмады. Тек сиз янгыдан онгайлыкълар къуруп яшама болсун учун, биз къолубуздан гелеген кёмекни этежекбиз. Эгер де сиз турагъан кёп къабатлыкъ уьй яшама ярай деп комиссия къарар къабул этсе, ремонт этип бережекбиз, болмаса, гьаригизни алдагъы къалипде яшавлукъ квартирлер булан таъмин этежекбиз. Шагьарны башчысы масъалалар нечик яшавгъа чыгъарылагъанны гьакъында магъа айта туражакъ. Тарыкъ болса, мен бирдагъы керен гележекмен», – деп билдирген Сергей Меликов.

Оьзлени янындан хатабалагьгъа тарыгъан уьйде яшайгъанлар республиканы Башчысына разилигин билдирген.