Язывчу ва таржумачы Агьматхан Аскеров тизген, «Ёлдаш» газетде чыгъып тургъан кроссвордланы чечме къарагъан охувчуларыбыз нече де кёп болгъандыр. Чечегенлер де болду, тек олар кёп тюгюл эди. Инг башлап халкъ артистибиз Нажмутдин Макъсутов чечип йибере эди. Айтагъаным, «Разилик» деген ат булан бу йыл Дагъыстан китап басмаханасында А. Аскеровну янгы проза китабы чыкъды.
Бу китапда язывчуну итти масхаралы, инче ихтилатлы, кимни де къурчун къандырардай къужурлу ва кюлкюлю хабарлары ерлешдирилген.
А.Аскеров Хасавюрт районну Яхсай юртунда тувгъан. Ол яяваякъдан айланып дегенлей, къумукъ халкъны авуз яратывчулугъун, къумукъ бойланы, ерлени, сувланы, авлакъланы, тёбелени, оьсюмлюклени, айрокъда дарман отланы атларын жыймакъ учун кёп къыйын тёкген. Сонг да, ол къумукъ-орус сёзлюкге гирмей къалгъан беш мингден де къолай сёзлени жыйгъан. Ол къумукъ халкъда асрулар бою къолланып гелеген адамланы атларын да ва хас калималаны, чалмюк сёзлени де жыйгъан. Ону «Алтын бюртюклер» деген китабы да басмагъа онгарылып битген. Ол – «Бар болугъуз», деген шиъру китапны да автору.
«Разилик» деген ат булан чыкъгъан бу китабында яшавда сийрек буса да къаршылашагъан, чалдырыш гьаллар булан янаша асил ва адилли адамланы оьрге чюеген хабарлары да аз тюгюл. Китапда аслу гьалда хабарлар, «Сыныкъгъанны агьы етер» деген повесть ва яшлар учун язылгъан хабарлар ерлешдирилген.
Автор оьзюню асарларында охувчуну тюзлюкге, тазалыкъгъа ва гьакъ гертиликге чакъыра.
Я. БИЙДУЛЛАЕВ.
