Район оьлчевде ярышлар оьтгерилди

Артдагъы гюнлерде Уллу Ватан давну ортакъчысы Ризван Турлавовну эсделигине байлавлу болуп фронтовикни уланларыны сиптечилиги булан Бабаюртда футбол оюндан район турнири оьтгерилди. Онда юртлардан гелген 10 команданы арасында чакъырылып гелген Солакъ посёлогуну командасы да ортакъчылыкъ этди.


 

Ярышланы барышында футболистлер оьзлени ойнап бажарагъанын оьр даражада гёрсетмеге болдулар. Бир команда да утдурма сюймей эди. Амма спортда лап яхшы гьазирлик гёргенлер утагъаны белгили. Шолай, мунда да оюну яхшы салынгъан ва сынавлу футболистлер булан толумлашгъан Бабаюртдагъы «АЗС Люкс» деген команда турнирни чемпиону болуп токътады. 2-нчи ва 3-нчю ерлеге буса Солакъ посёлоглулар ва адилянгыюртлу «Бирлик» деген команда ес болду. Утгъанлагъа ва савгъатлы ерлеге ес болгъанлагъа кубоклар, грамоталар ва багьалы савгъатлар тапшурулду.

Ондан къайры да, турнирни гьасилин чыгъарывда футболистлени лап яхшылары белгиленди. Судьяланы къаравуна гёре, Уллубий Арсланбеков − лап яхшы оюнчу, Хизири Жумакъаев, Билал Билалов ва Анвар Мугьутдинов − лап яхшы чапгъын этивчю, якълавчу ва къапучу деп билдирилди. Булар бары да − «Люкс» команданы топ оюнчулары.

Сонг да, яхшыланы арасында «Бирлик» командадан Иса Исаев ва турнирде лап кёп гол гийирген «Солакъ» командадан Амир Исакъов да эсгерилди. Олар бары да айры кубоклагъа ва эсделик савгъатлагъа ес болдулар.

  

Авторизация
*
*
Регистрация
*
*
*
Согласны с условиями сайта?
Генерация пароля