Гьар адамны оьз къысматы, гиччиден тутуп юрегинде кёп сюеген касбусуна ес болмагъа умуту бола ва шогъар етишмеге къасткъыла. Гьар ким яшавда оьзю сюеген касбуну танглай, оьзю сюеген адам булан оьмюрюн байлай.
Шолай, гележегин жагьил заманындан тутуп гёз алгъа гелтирип, погонлу опуракъ гиймеге гьасиретлиги булан, оьзюню умутларына етишген терен билимли юрист Расул Халитович Мамашевни гьакъында язмагъа сюебиз. Ол Хамаматюртда тувгъан. Ата юртунда орта школаны битдирип, 1973-нчю йылда Германия демократ республикада асгер борчун кютген.
Къайтгъанда Расул Мамашев оьр билим алмагъа токъташа ва 1976-нчы йылда СССР-ни МВД-сини Волгоград шагьарында сорав алывчуланы – следователлени оьр школасына охумагъа тюшюп, ону 1980-нчи йылда оьр къыйматлагъа битдирген. Ондан сонг Расул Халитович Дагъыстан Республиканы МВД-сини системасында следователь болуп ишлеген.
1987-нчи йылдан 1995-нчи йылгъа ерли Бабаюрт район администра-циясыны юрист бёлюгюню ёлбашчысы болуп чалышгъан. Онда ишлеп турагъан вакътиде Расул Мамашев Россия Федерацияны Президентини янындагъы иш юрютюв академиясына охумагъа тюшген ва ону «юриспруденция» деген курсун толу кюйде тамамлагъан.
1995-нчи йыл Расул Халитович Къарабудагъгент районну прокуроруну баш кёмекчиси этилип белгиленген. 1999-нчу йылда буса ол Бабаюрт районну прокуроруну орунбасары болуп ишлемеге чыгъа. Сонггъу йылларда Расул Мамашев Дагъыстан Республиканы прокуратурасыны тюрлю-тюрлю бёлюклеринде чалышгъан.
«Прокуратура – арза булан гелген адамланы толу ва натижалы кюйде аз заманны ичинде якъламагъа болагъан пачалыкъ къурум. Жинаятчылыкъны алдын алыв ва коррупцияны ёкъ этив, халкъны ихтиярларын якълав, экономика аралыкъланы бирлешдирив булан таъмин этив – прокуратураны къуллукъчуларыны аслу борчу», – деп эсгере оьзюню касбусуну гьакъында Расул Мамашев.
2015-нчи йылда Россия Федерацияны Баш прокуроруну буйругъуна гёре, Расул Халитовичге «Юстицияны оьр ойчусу» деген чин берилген.
Расул Мамашев къайратлы загьматы, оьз ишине жаваплы янашып, алдына салынгъан масъалаланы заманында кютеген саялы, Россия Федерацияны Баш прокуратурасыны, Дагъыстан Республиканы прокура-турасыны ва МВД-ни янындан гьюрметлев грамоталар, медаллар булан кёп керенлер савгъатлангъан.
Бугюнлерде Расул Мамашев – пенсияда. Ол агьлюсю Эма булан бир улан ва эки къызны оьсдюрюп, олагъа оьр билимлер бергенлер. Ата-анасы берген тюз тарбияны натижасында олар да яшавда оьз ерин тапгъанлар ва касбусуна гёре ишлеп туралар.
Расулну лап да уллу сююнчю – балаларыны балалары. Олар ону гьар гюн дегенлей оьр къыйматлары ва яхшы ишлери, оьзлени барлыгъы булан сююндюрелер.
Биз Расул Халитовични оьтген жумада белгиленген касбу байрамы булан къутлап, огъар яхшы савлукъ, арты битмейген насип, агьлюсю булан татывлукъда дагъы да узакъ йыллар яшамакъны ёрайбыз.
