Тюнегюн, 15-нчи июнда, Дагъыстанны Халкъ Жыйы­нында «Расул Гьамзатов: шаир, политик, ватандаш» деген конференция оьтгерилди. Конференцияда Пачалыкъ Думаны ва Дагъыс­танны Халкъ Жыйыныны депутатлары, жамият къуралланы ва маълумат къурумланы вакиллери ортакъчылыкъ этди.

Жыйынны юрютген Дагъыстанны Халкъ Жыйыныны Председателини 1-нчи орунбасары Юрий Левицкий конференцияны ортакъчыларына Дагъыстанны Башчысы Сергей Меликовну чакъырывун охуду ва Расул Гьамзатовну гьакъында доклад этди.

Ондан сонг сёйлеген Дагъыстанны Язывчуларыны союзуну ёлбашчысы Марина Агьматова Р.Гьамзатов 52 йыл язывчуланы башчысы болуп тургъанны эсгерди.
− «Мени шонча йыллар сакълайгъаны тийишли деп тюгюл, менден сонг дагъы да яманы гелмесин деп», − айта бола эди, ол масхара этип, − дей М.Агьматова. − Тийишли чи нечик де дюр эди, ол шонча йыллар пайдалы ишлеп де турду. Биздеги адабият музейде ону загьмат книжкасында бир языв бар: «1951-нчи йылда Дагъыстанны Язывчуларыны союзуну председатели болуп сайлангъан ва ахыр гюнлерине ерли ишлеген». Ол адабиятны тарбиялав маънасын артдырмакъ учун кёп къасткъылгъан ва Дагъыстанны атын савлай дюньягъа белгили этген.

Шолай да, конферен­цияда язывчу, Гь. Ца­дасаны атындагъы авар театрны директору Магьаммат Бисавалиев, Пачалыкъ Думаны депутаты Федот Тумусов, А. Тахо-Години атындагъы Дагъыстан илму-ахтарыв институтуну старший къуллукъчусу Миясат Муслимова, профессор Людмила Авшалумова, «Адабият Дагъыстан» журналны баш редактору Мурат Агьматов, профессор, Дагъыстанны халкъ артисткасы Найида Абдурагьманова, Хунзах районну башчысы Нюрмагьаммат Задиев ва башгъалары сёйледилер.

Конференцияны ахырында Расул Гьамзатовну къызы Салигьат атасын абурлап шулай къайдадагъы жыйын оьтгерегени учун баракалла билдирди ва ону гьакъындагъы къужурлу мюгьлетлени эсгерди.