Рагьмулу кёмек етишдирилди
Рагьмулу кёмек етишдирилди
Алдагъы гюнлерде гьава-десант асгерлени Къызылюрт шагьардагъы советини председатели, шагьар администрацияны гьакимбашыны жамият кёмекчиси Къанболат Салавовну сиптечилиги булан Украинада юрюлеген хас асгер гьаракатда ортакъчылыкъ этегенлеге гезикли рагьмулу кёмек етишдирилген.
Донбасда хас асгер операция юрюлеген бойда дав агьвалатларда ортакъчылыкъ этегенлеге сув ва оьзге тарыкъ-герек булан солдатлагъа орта школаланы охувчулары язгъан кагъызлар да бар эди. Дейгеним, шо рагьмулу кёмек хас дав гьаракатларда ортакъчылыкъ этеген Россияны асгер къуллукъчуларына, сонг ополчениеде токътагъанлагъа ва еринде яшавлукъ къургъан ватандашлагъа эсен-аман етишдирилген.
Рагьмулу кёмекни узатагъанлар Украинада асгер къуллугъун кютегенлер булан ёлукъгъан. Инг башлап олар оьзлени сапары булан Луганск шагьарда ерлешген республика клиника больницасында яраларын сав этеген асгерчилер булан ёлугъув оьтгерген. Сонг олар 1943-нчю йылда генерал Ватутинни ёлбашчылыгъы булан шагьарны немис елевчюлерден азат этген Уллу Ватан давну ветеранларыны эсделигине салынгъан мемориалгъа чечеклер салгъан.
Херсон областда ерлешген Каланчак деген шагьарда буса Дагъыстандан баргъан Афгъанистанны ветеранлары, шоланы башын тутгъан бизин якълы Къанболат Салавов да Уллу Уьстюнлюкню байрагъын яйгъан.
Шондан къайры да, рагьмулу кёмекни узатагъанлар Донецк, Луганск, Мариуполь, Мелитополь шагьарларда, Украинада юрюлеген хас асгер гьаракатда белгили болгъан «Азовстальда» ва олай да башгъа ерлерде болгъан.
Алибек САЛАВАТОВ.