Хасавюрт районну Эндирей юртуну янында болгъан жы­йынны гьакъында кёп айтыла. Юртну башчысы англатыв береген кюйде, шо жыйынны сиптечилери башгъалар, тек шонда айлана юртлардан да тиштайпалар къошулмай къалмагъан.

Шо гюн Дагъыстанны Башчысы Сергей Меликовну тапшурувуна гёре Хасавюрт районгъа баргъан Россияны Пачалыкъ Думасыны депутаты Солтан Гьамзаев, Дагъыстанны Гьукуматыны Председателини орунбасары Муслим Телякъавов ерли военкоматны тюз ишлемегенин аян этген. Шондан сонг Дагъыстанны Башчысы С.Меликов оьзюню «Телеграм-каналында» язгъан кюйде, адамланы ихтиярларын бузагъан гезиклер болса, тарыкълы къуллукълагъа билдирмекни айтгъан.

Эндирейлилер юрюлюп турагъан хас асгер гьаракатны якълайгъанны ва «чёплеп» этилинеген мобилизацияны талапларын кютегенни юртда болгъан митингде бирдагъы да исбат этди. Сентябр айны 27-синде Эндирейдеги спорт майданда мингден де артыкъ санавдагъы адам жыйылып, Россия армияны ва Президент В.Путинни ёлун якълайгъанны бирдагъы керен де ташдырды.

«Zащита, Zамир, Zа Путина» деген чакъырывну тюбюнде генг кюйде оьтгерилген митингде район администрацияны ва огъар гиреген бёлюклени, ерли военкоматны къуллукъчулары, Дагъыстанны Халкъ Жыйыныны, район ва юрт жыйынларыны депутатлары, афгъан давда ортакъчылыкъ этгенлени союзу, тамазаланы, тиштайпаланы советлерини ва Жамият палатаны ортакъчылары, районну активи, дин къуллукъдагъыланы ва яшёрюмлени вакиллери ортакъчылыкъ этдилер.

Шонда сёйлеген Хасавюрт район администрацияны башчысы Арсланбек Алибеков Президентни ёлун якълайгъан гьаракаты учун жыйылгъанлагъа баракалла билдирди.

–Бугюнлерде савлай уьлкебизге енгил тюгюл, алдан эсе бизин бирлигибиз огъар гьали артыкъ тарыкъ, − дей А.Алибеков. – Гьарибизден этилеген якълав Ватанны беклешдирежек ва гележек ярыкъ яшавубузну канзилери болуп токътажакъ. Бизин райондан гетген ва хас асгер гьаракатда юзлер булангъы уланлар аталаны антына амин болуп къоччакълыкъ гёрсете. Мобилизация булан баргъанлар да шолардан кем болмажакъгъа инанабыз. Мен хас асгер гьаракатда ортакъчылыкъ этегенлеге гьакъ юрекден разилик билдиремен. Бугюнгю мингден де артыкъ адам жыйылгъаныбыз оланы ругьун гётережекге ва Президентибизни ёлу тюз экенге инамлыкъ этегенни бирдагъы керен де гёрсете. Гюнбатыш бойдан гелеген къоркъунчлукъну алдын алып, харлысызлыгъыбыз учун жанын-къанын аямай айланагъан уланларыбыз тезликде уьстюнлюк булан уьйлерине къайтсын.
Шолай да, жыйында тюрлю-тюрлю идараланы къуллукъчулары уьлкени башчысы халкъны, айрокъда яшланы гележегин якълавну масъалаларын алгъа салагъанны, олар эркин ва шатлыкъда яшасын учун этилегенни айтдылар.

Жыйында сёйлеген буссагьатгъы вакътиде хас асгер гьаракатда ортакъчылыкъ этип турагъан Динислам Вагьабовну анасы Жамиля Ватанны якълавчулары душманланы енгип, тезликде уьйлерине сав-саламат болуп къайтмакъны ёрады.

Жыйын патриот йырланы концерти булан тамамланды.

РЕДАКЦИЯДАН:
Президентни ёлун якълайгъан жыйынлар Бабаюрт, Къаягент, Къарабудагъгент, Къызылюрт ва Буйнакск районларда да оьтгерилген.