Белгили экени йимик, Россияны Президенти Владимир Путинни Указы булан бу йыл савлай уьлкеде Дагъыстанны халкъ шаири Расул Гьамзатовну йылы гьисапда белгилеген. Ол тувгъанлы 100 йыл битегенликге байлавлу гьаракатлар савлай уьлкеде йыл боюнда юрюлюп туражакъ. Шо агьвалатгъа багъышлангъан гьаракатлар бизин республиканы юртларында да, шагьарларында да оьтгериле.
Шолай, алдагъы гюнлерде Къарабудагъгент юртда да Дагъыстанны халкъ шаири Расул Гьамзатов тувгъанлы 100 йыл битегенликге багъыш-лангъан гьаракат оьтгерилди. Эсгерилген районну администрациясыны маданиятгъа ва туризмге къарайгъан бёлюгюню сиптечилиги булан оьтгерилген шо гьаракатда ерли гьакимлик къурумларыны жаваплы къуллукъчулары, маданият идараланы касбучулары, муаллимлер, олай да охув ожакъларда билим алагъан уланлар ва къызлар оьзлени ортакъчылыгъын болдурду.
Инг алда Къарабудагъгент районну гьакимбашы Магьмут Амиралиев жыйылгъанланы алдына чыгъып сёйледи. Ол оьзюню сёйлевюнде савунда аты данггъа чыкъгъан, савлай дюньяны шаири, элчиси гьисапда айтылып тургъан тенгсиз пагьмулу шаир Расул Гьамзатовну яратывчулугъу оьзюню агьамиятлыгъын тас этмейгенин айрыча эсгерди. Бугюнлерде де ону аты савлай дюньяда айтылып турагъанлыкъ булан бирге къаламындан чыкъгъан асарлары бизин уьлкеде йимик, шондан тышда да милли тиллеге таржума этилегенин ташдырды.
Оьтгерилген гьаракатны башындан ахырына ерли бажарывлу кюйде юрютген Ариза Унаева ва Къарабудагъгент районну китапханасыны къуллукъчусу Айзанат Пашаева биринден-бири алып дегенлей, шаирни яратывчулукъ тархларын гёзден гечирди. Къарабудагъгентдеги охув ожакъларыны муаллимлери ва охувчулары шаирни асарларын къумукъ, орус, дарги, гьатта ингилис тилде де охуп алды. Шондан сонг да, Россияны умуми билим беривюню гьюрметли къуллукъчусу, Дагъыстанны ат къазангъан муаллими Илмугьат Абдуллаева шаирни «Россияны солдатлары» деген поэмасындан бир гесегин жанлы кюйде жыйылгъанланы къурчун къандырып гёнгюнден охуду. Къарабудагъгентдеги уьч номерли орта школада ана тил ва адабият дарсланы юрютеген Дагъыстанны билим беривюню отличниги Написат Сайитова оьзю шаирге багъышлагъан шиърусун жыйылгъанлагъа малим этди. Агъай Къаплановну атындагъы хоргъа къуршалгъанлар да Р. Гьамзатовну сёзлерине гёре йырланы айтып къаравчуланы ругьланывлу харс урувларын къазанды.
Къарабудагъгентдеги хас школа-интернатда иш гёреген «Дагъыстанны яшлыгъы» деген ансамблини чыгъышы да жыйылгъанланы рази къалдырды. Шо гюн оьтгерилген гьаракат бугюнлерде де парахатлыкъгъа чакъырагъанда йимик чалынагъан шаирни «Акъ турналар» деген йырын бары да жыйылгъанлар алышып йырлап тамамланды. Дагъыстанны халкъ шаири Расул Гьамзатовгъа 100 йыл битегенликге багъышланып Къарабудагъгентде оьтгерилген гьаракат, гертилей де, герти, гьакъ поэзияны байрамына
