Оьтген жуманы ахырында А. Тахо-Години атындагъы Дагъыстан илму-ахтарыв педагогика институтунда гьалиги шартларда ана тиллени уьйренивге багъышланып, илму-сынав конференция оьтгерилди. Шону ишинде оьр охув ожакъларда ва оьзге илму идараларында чалышагъан муаллимлерден, алимлерден къайры, билим берив тармакъны жаваплы къуллукъчулары ортакъчылыкъ этди.

Оьтгерилген шо конференцияны барышында бугюнлерде билим берив тармакъда милли тиллени уьйренивге не къадар тергев берилегени арагъа салынып ойлашылды. Оланы сакъламакъ ва оьсдюрмек учун не йимик чаралар гёрмеге тюшегени гьакъда да пикру алышдырыв болду.
Инг алда жыйылгъанланы алдында Дагъыстанны билим беривге ва илмугъа къарай­гъан министрини заместители Айида Далгьатова сёйледи. Ол оьзюню сёйлевюнде бизин республиканы охув ожакъларында милли тиллерде дарсланы юрютювге байлавлу артгъа салынмай чечилмеге тюшеген масъалаланы гьакъында айтды. Охувчуланы китаплар булан таъмин этив масъалагъа да айрыча агьамият берди.

Ону сёзлерине гёре, бу йыл бизин республиканы охув ожакъларында билим ала­гъан яшланы китаплар булан таъмин этмек учун бюджетден 220 миллион манат гёрсетилген. Гетген йылларда гёрсетилген акъча маялардан эсе шо хыйлы артыкъ. Шо масъаланы чечивге де мекенли имканлыкълар тувдура. Бизин республикада ана тиллени уьйренивге байлавлу гесимлени тасдыкъ этив де шо тармакъдагъы масъалаланы кёбюсюн чечмеге шартлар ярата.

Шондан сонг А. Тахо-Години атындагъы Дагъыстан илму-ахтарыв педагогика институтуну директору Альбина Арухова ана тиллени муаллимлери оьзлени гьар гюнлюк жанлы гьаракаты булан яш наслуну вакиллерине милли маданият мердешлерине, халкъыны адат-къылыкъ битимине тюшюнмеге болушлукъ этегенин эсгерип сёйледи. Буссагьатгъы вакътиде оьзю ёлбашчылыкъ этеген илму-ахтарыв къурумуну къуллукъчулары не къадар иш юрютегенин малим этди.

Ону пикрусун узата туруп, эсгерилген институтну бёл­юклерини ёлбашчылары Х. Вакилов ва М. Байрамбеков ана тиллени ва адабиятны уьйренивню бир-бир масъалаларына жыйылгъанланы тергевюн бакъдырды.

Оьтгерилген илму-сынав конференцияны оьлчевюнде юрюлген жыйын тамамлангъан сонг, ону ортакъчылары, айры-айры гюплеге пайланып, оьзлени пикру алышдырывун узатды. Ана тилден ва адабиятдан дарс беривде мекенли сынав топлагъан бажарывлу муаллимлерини конференцияны оьлчевюнде юрютген ачыкъ дарслары да оьзлени иш ёлдашларыны, касбучуланы да тергевюн тартды. Шо гьакъда айта туруп, Буйнакскидеги муаллимлер гьазирлейген коллежини муаллими Румулият Алиева да оьзюню алдында билим алагъанланы къуршап, оьзге муаллимлер сынавун уьйренмеге болардай дарс оьтгергенин айрыча эсгермеге тюше.

Илму-сынав конференцияны гьасиллерине гёре шону оьлчевюнде болгъан сёйлевлер топланып айрыча китапча чыгъарылмагъа гёз алгъа тутула.