Оьтген айны ахырынчы гюнлеринде Къоркъмаскъаланы боюндагъы аэродромда парашют спортдан ачыкъ ярышлар оьтгерилди. Шо ярышлар ДОСААФ-ны 90 йыллыгъына багъышланды. Шоларда Темиркъазыкъ-Осетия-Аланиядан, Ингушетиядан ва Аштархандан гелген ва дагъыстанлы 72 спортчу ортакъчылыкъ этди.
Ярышланы ача туруп, Россияны ДОСААФ-ны Дагъыстан регион бёлюгюню ёлбашчысы Шамил Алиев къурумну бай тарихи гьакъда айтды.
1933-нчю йылда къурулгъан бёлюкден минглер булангъы жагьиллер оьзлеге касбулар алып чыкъгъан, кёбюсю асгерде къуллукъ этивге гьазир болгъан.
Къурум яратылып биринчи йыл клуб 28 лётчик ва 107 парашют спортчу гьазирлеген. ДОСААФ-дан оьтген Юсуп Акаев, Владимир Вороненко, Владимир Громаковский, Александр Ситковский ва Гьажи Буганов Совет Союзну Игити деген оьр атгъа ес болгъан.
Парашют спортдан дюньяны чемпионлары Наби Аминтаев ва Аминат Солтанова, Любов Немкова, СССР-ни чемпиону Муслим Гьасанов, СССР-ни самолёт спортуну баш тренери Къасум Нажмутдинов – бары да Дагъыстан бёлюкде тарбиялангъанлар.
Яхшы натижалар гёрсетген спортчулагъа савгъатлар, кубоклар ва грамоталар берилди.
