Пагьмуланы жыйгъан фестиваль

Гьар йыл март айны ахырында Къоркъмаскъалада пагьмулу яшланы «Энемжая» деген фестивалы оьтгериле. Бу йыл да шо фестивальда Хумторкъали, Бабаюрт, Буйнакск, Къазбек, Къарабудагъгент, Къаякент, Ногъай, Сергокъала ва Хасавюрт районланы, шолай да Избербаш, Къызлар ва Хасавюрт шагьарланы яш пагьмулары ортакъчылыкъ этди.

Олар халкъ йырлардан ва бийивлерден къайры да, орус ва Дагъыстанны тюрлю-тюрлю тиллеринде янгы йырланы йырлап ва башгъа тюрлю пагьмуларын гёрсетди.

–Гьар йыл шу фестиваль Да­гъыстанны маданият министерлигини, халкъ яратывчулукъ уьюню ва Хумторкъали районну администрациясыны гьаракаты булан оьтгериле, – дей фестивальда ортакъчылыкъ этген районну башчысыны орунбасары Жамалутдин Юсупов. – Булай фестиваллар яшлар учун чу нечик де, уллулар учун да бек тарыкълы. Фестиваль яшланы бир-бирини маданияты булан таныш эте, бизин милли адатланы унутулма къоймай.

«Энемжая» деген фестиваль оьтгерилегенли 15 йыл бола. Шо заманны ичинде ортакъчылыкъ этген яшланы бирлери – бугюнлерде белгили артистлер де дюр.

– «Энемжая» 7 тюрлю ренкли ва яшланы гийимлери де тюрлю-тюрлю тюслерде бола. Олар бизин милли бийивлени бийий, йырлай, милли музыка алатланы согъа, алдын ерлиги адатларыбызны гёрюнюшлер этип гёрсете, – дей Хумторкъали районну маданият ва яшёрюмлени ишлерине къарайгъан бёлюгюню ёлбашчысы Мадина Къанаматова.
Фестиваль бу гезик де бек къужурлу оьтдю, къарама гелгенлени кепине гелди.

Авторизация
*
*
Регистрация
*
*
*
Согласны с условиями сайта?
Генерация пароля