Март айны 29-нда «Дагестанская правда» газетни редакциясында Дагъыстан Республиканы юстиция министрини заместители Сергей Караченцев журналистлер булан ёлугъуп прес конференция оьтгерди. Ёлугъув Дагъыстан Республиканы пачалыкъ архивини 100 йыллыгъына багъышлангъан эди.

С.Караченцев Дагъыстан Республиканы пачалыкъ архив фонду уллу экенин ва эсгерилген фондну материалларын компьютер къураллагъа гийиривге байлавлу иш юрюлегенни эсгерди. Ону айтывуна гёре, гележекде архивлени бары да материаллары шо къайдада сакъланажакъ ва ватандашлагъа къолламагъа ихтияр берилежек.

Ол архив материалланы цифралашдырывда архивлерде токъташыдырылгъан талаплагъа гёре сакълана буса да тавшалгъан, къавжагъан материаллар четимлик тувдурагъанын ва шо себепден ишни барышын узакълашдырагъанны гьакъында да айтды.

Архив документлер сакъланагъан фондлар бары да шагьарларда ва районларда, демек муниципал къурулувларда бар. Ватандашлар архивден справка алмагъа оьзлер яшайгъан ерлердеги архивге барып яда эсгерилген къурумланы сайтларына арза язып алмагъа бола.

С. Караченцевни сёзлерине гёре, бугюнлерде ерлерде алда йимик айрыча архив къурумлар къалмагъан, тек муниципал къурулувланы янында иш гёреген касбучулар архив ишлени де юрюте.
Гьали Дагъыстан Республиканы пачалыкъ архивинде 158 касбучу ишлей. Шо буса кёп тюгюл. Дагъыстанда да архивлер учун касбучулар гьазир этилмей. Россияны шагьарларында да шо касбугъа уьйретеген къурумлар кёп тюгюл.