«Анжи» оюнну къыйын башлады. Биринчи он минут къонакълар бизин къапучу Кержаковну да, якълавчуларыбызны да яхшы къыстады , бир къоркъунчлу мюгьлет этип де бажарды, насипге, топ бизин къапуну гёнделен багъанасына тийди.
Шо мюгьлетден сонг, Сергей Ташуевни трибуналарда олтургъан къаравчулар да эшитеген кюйде акъырывларыны да кёмеги булан, «Анжи» эс табып, оьзюню чапгъынларын башлады. Биринчи тайм битип къалгъынча къонакъланы оьз къапуларын якъламакъдан къайры дагъы ою ёкъ эди.
Тюзюн айтма тарыкъ, къонакъланы якълавчулары да, къапучусу Станислав Бучнёв да оьзлени къапусун бажарывлу якълады. Он тогъузунчу минутда чы майдандан Максимов ургъан топну «Волгарны» къапучусу нечик тутуп къойгъанына журналистлер оюн битгенде де ажайып тамаша бола эди.
Илья Максимовгъа ва Амаду Мутариге шо оюнну игитлери деп айтма ярай. Эки де футболистни гьаракаты булан аштарханлыланы къапусуну алдында оюнну узагъында болгъан чакъы къоркъунчлу мюгьлетлер бир нече оюнгъа таманлыкъ этер эди. Тек биринчи тайм къуру санав булан битди – 0:0.
Танапус битип, экинчи таймны майданны ортасындан бизинкилер башлады, Амаду ва Максимов къургъан комбинацияны бузабыз деп, къонакълар Максимовну оьзлени штрафноюну къырыйында йыкъды, судья штрафной берди. Максимов да штрафнойдан уруп топну Бучнёвну къапусуну лап мююшюне гийирди. Гол… Адам къарап турар йимик арив гол болду.
Экинчи таймда да бизинкилени азындан уьч — дёрт юз процентли мюгьлетлери болду. Тек башлап Мутари, сонг Асилдаров, артда Исламнур Абдулавов шо мюгьлетлени къолдан чыгъарды. Оюнну ахырында футбол майдангъа чыкъгъан бизин жагьил Сердеров да, Абдулавов да оюнну яхшы якъгъа алышдырды.
Гьали оюн 1:0 санав булан битди дегенде, Абдулавовну пасындан пайдаланып, Амаду Мутари «Волгарны» къапусуна экинчи топну гийирди – 2-0! Оюн битди.
Шарабутдин КИШИЕВ
