---

Бетинг бурма къартлыкъгъа

 

(Бадрутдинни юбилейине)

 

Йыллар агъа сув йимик,

Сюймесек де, гёресен.

70 йыллыкъ къартман деп

Бюдюреме, вёре, сен.

 

Кёпюр болдунг ялгъайгъан

Къумукъну тюрк дюньягъа.

Сапар этдинг кёп элге,

Гьатта Венгриягъа.

 

Сени охуй къумукълар,

Руслар, лаклар, даргилер.

Энниден сонг да сени

Кёплер охужакъ, билер…

 

Асиллик де бар сенде,

Иссилик де бар сенде.

Болат темирде йимик

Къаттылыкъ да бар сенде.

 

Ачыкъ айдай кимге де

Ачылып да билесен.

Шатлыкъда йырлап, бийип,

Чанчылып да билесен.

 

Дейгеним мен, Бадрутдин,

Къартлыкъгъа бетинг бурма.

Ёрайман кюрлюк, савлукъ

Энни де жагьил турма.

 

Гюлсюм

 

Хатар балагьгъа тарып,

Эси ёкъ бир адамны,

Оьз баланг йимик билип,

Сукъландырдынг аламны.

 

«Гюлсюм» деп гьюрмет булан

Дюнья эсгерди атынг,

Рагьмулу юрегингде,

Сакълап тургъан ниъматынг.

Ол зайып, болмай сёйлеп,

Танымай къолун-бутун.

Ону эмсиз сав этмек,

Гюлсюм, сени умутунг.

 

Шону учунму, «Умут» деп

Огъар сен ат къойгъансан,

Ананы иссилигин

Юрегине къуйгъансан.

 

Кёплер бардыр «Умутну»,

Ахтарагъан, излейген,

Тек сен янгыз биревсен,

Огъар насип гёзлейген.

 

Мен де умут этемен,

Разимен жаным берме,

«Умут» аякъгъа туруп,

Гелер деп сени гёрме.

Исахан гьажини эсделигине

 

Къумукъ халкъны оьтесиз оьктем этип,

Азиз юртлум къалдынг сен чакъсыз гетип.

Гьюрмет булан атынг эсге аламан,

Юрегимни тёр янына саламан.

 

Зувап учун оьз намусунгну кютме,

Ёллар тапдынг Гьажгъа яяв юрюме.

Даим бизин оьзден этип тургъансан,

Яшавунгну элинг булан къургъансан.

 

Самбо ябушувну гючлю устасы,

Тенгиримни тап-таза нарыстасы,

Яхшылыкъгъа уьйретгенсен яшларынг,

Амма бир де тюймегенсен къашларынг.

 

Ботаюртда тизив музей ачгъансан,

Къумугъунга шавлаларынг чачгъансан,

Оьзюнгден сонг таймасдай хат къойгъансан,

Оьз халкъынгны сюювюн къазангъансан.

 

 

Ата юртум

 

Загьмат тёкдюк эркин авлакъларынгда,

Ойнап оьсдюк сени орамларынгда.

Емишлер де жыйдыкъ сени бавунгда,

Яшлыгъыбыз яшнады Къойсувунгда.

 

Эренлеринг сени даим оьр этген,

Сени учун кёплери оьлюп гетген.

Оьзденлигинг абурлайбыз, якълайбыз,

Юреклерде сени атынг сакълайбыз.

 

Гёзел юртум, оьктем юртум, шат юртум,

Сени булан муратларым, умутум.

Дюрсен, юртум, Къумукътюзню тарыгъы,

Гёзлеримни шавласы ва ярыгъы.

Гёзелим, Къакъашура

 

Бир янда къакъа суву,

Бириси янда Хурса.

Гелинингни шундан ал,

Айып этгир, геч турса.

 

Язывчусу лап да кёп,

Гёзелим, Къакъашура,

Гьаракатда артындан,

Къазаныш етме тура.

 

Хурса сувундан ичип,

Терегинден чум ашап.

Тапсанг яшав ёлдашны,

Къаларсан мунда яшап.

 

Къакъашура юртумну,

Айтылгъаны ёкъ яман.

Гертме кампотун ичсенг,

Чархынга болур дарман.

 

Чумлардан эрнинг бояп,

Паламны бетинге ишып,

Огъар чертлевюк къошсанг,

Турар къурсагъынг шишип.

Къакъашура – уллу юрт,

Дёрт де яны талалар.

Яхшы къатынынг болса,

Ишлежексен къалалар.

 

Ювугъумну уланы Мажитни эсделигине

 

Ким буса да шофёр болуп бажармай,

Сибирлени сувукълугъун кютмеге.

Тюмен бойну топурагъын таптадынг,

Эр намусунг бир ерде де сатмадынг.

 

Мажит, сагъа Аллагьымдан тилеймен,

Женнетлени къапулары ачылсын.

Авлетлеринг алмасынлар яра да,

Гьюрю къызлар алсын сени арагъа.

 

Кёп сюеген шаириме

 

Бел бугюп, этек чалып,

Къуллукъ этип халкъынга,

Оьрленесен гюнден-гюн,

Гёз тиймесин хатынга.

 

Нугь пайхаммар ёрагъан,

Шулай сыйлама хатынг,

Герти, «Тюш намаз» булан,

Кёклеге чюйдюнг атынг.

 

Юрекге дарман бола,

Шо сен язгъан «Сёнмесгюл».

Сёнмесгюлдей нюр берип,

Шавла чачсын сагъа гюн.

 

Кёп уллу уьстюнлюклер

Ёрайбыз халкъынг сагъа.

«Дагъыстан халкъ шаири»,

Деген атны алмагъа.