Спортну тутушуп ябушув журасында артдагъы йылларда Къаягент районну кочаплары етишеген натижалар яхшы белгили. Олар Дылымда оьтгерилген республика чемпионатында шону бирдагъы гезик исбатлады.
Эки гюн ярышлар 2007-2008-нчи йылларда тувгъан яш кочапланы арасында оьтгерилди. Шоларда Къаягент районлу кочаплар биринчи ва 3-нчю ерлеге ес болдулар. Артдагъы эки гюн халчагъа 2010-2012-нчи йылларда тувгъан яшлар чыкъдылар. Оланы арасында да 3 къаягентли кочап бронза медаллагъа ес болдулар.
Залгъа гелгенлер дёрт гюнню ичинде къужурлу ябушувланы гёрдюлер. Каникулланы вакътисинде оьтгерилеген бу ярышланы даражасы йылдан-йылгъа гётериле. Оьтген ярышлар шону бирдагъы гертиледи. О.Умалатов — 44 кило (Янгывикъри), Магьамматали Магьамматов — 75 кило (Къаягент) биринчи ерлеге ес болдулар. Къаягентден У. Ихласов — 35 кило, М. Нурбавматов — 35 кило, Р.Алиболатов — 48 кило уьчюнчю ерлеге гётерилдилер.
Спортну тутушуп ябушув журасы булан машгъул болагъан яшланы санаву Къаягент районда йыл сайын арта. Шо бизин къувандыра. Яшлар гиччиден берли яман хасиятланы ташлап, спорт заллагъа юрюй, кёплери бусурман динге къуллукъ этмеге башлай, тюзлюкню, тазалыкъны ёлуна тюше. Белгили кочаплар етишген уьстюнлюклер гиччилени де оьр натижалагъа талпындыра. Къаягентде, Янгыкъаягентде, Гьюсемегентде, Янгывикъриде, оьзге юртларда магьачкъалалы, хасавюртлу кочаплар булан тенглешмеге бажарагъан яш кочапланы санаву арта.
Магьамматрасул ИБРАГЬИМОВ,
