– Сизин бёлюк нече районгъа къарай?
– Бёлюк Хасавюрт, Къызылюрт шагьарларда, Новолак, Къазбек ва Хасавюрт районларда иш гёре. Мунда яшайгъанланы санаву 500 мингден де оьтген.
– Къайсы шагьарда ва районда наркоманлар, наркотиклер къоллайгъанлар, сатагъанлар кёп?
– Оланы аслу яны – Хасавюрт шагьарда. Тек гетген йыл наркоманлар бар деп арагъа хабар чыкъмагъан эки район бар – Новолак ва Къазбек районлар. Шо районларда наркотиклер къоллайгъанлар ёгъу бизин сююндюре.
– Бу регионгъа тышдан наркотиклер гелтирип сатма къарайгъанлар да бардыр?
– Олайлар да бар. Бизин бёлюк аз заманны ичинде тышдан гелеген дёрт ёлну япды. Озокъда, бу тынч иш тюгюл. Шогъар бир тюрлю хас чаралар ва ишлер оьтгерме тюшдю.
– Сатагъанлардан ва къоллайгъанлардан нечакъы наркотиклер чыгъарып алынгъан?
– Бизин бёлюк 56 жинаятчы ишни аян этген. Олардан 33-сюне уголовный ишлер ачылгъан. Судгъа буса 27 иш йиберилген. Героин – 757 грам, гашиш – 308 грам, марихуана – 1555 грам чыгъарып алынгъан. Сатагъанланы арасында 4 къатынгиши де барын айрыча эсгерме сюемен. Оланы барын да биз тутгъанбыз.
– «Мак» деген хас чаралар оьтгерегенде, хашхаш чачылагъан ва оьсеген ерлени токъташдырма болдугъузму?
– Артдагъы йылны ичинде хашхаш чачагъанланы тутмагъанбыз. Олай ерлер гьали ёкъ. Шо да яхшы. Амма орманларда оьсеген хашхашны тапгъанбыз ва яллатгъанбыз. Бёлюкде иш юрюле. Айтагъаным, наркотиклеге къаршы ябушув бир де токъталмай.
– Ишигизде къыйынлыкълар да болмай къалмайдыр..
–Билемисиз, къыйынлыкъ дегенде, ата-аналар яшлары тутулгъанча бири де бизин бёлюкге гелип гьалны айтмайгъаны, яшырагъаны яман. Биз оланы тутгъан сонг бары да чабып гелелер. Наркотик къоллайгъанланы яда сатагъанланы тутгъанда буса, ата-аналар оланы якълап, къаршылыкъ билдирегени англашылмай.
Муна олайлар булан да биз кёп профилактика ишлер юрютебиз.
Ватандашлагъа наркотиклени ким сатагъанны англаса, бизге билдирсин деп буварабыз. Аптеклерде наркотиклери булангъы дарманланы сатып алагъанланы да тутгъанбыз. Кёп аптеклени де япгъанбыз. Олай уллу ишлер этмесе, наркоманияны яйылывун токътатмагъа болмажакъбыз.
Измулла ГЬАЖИЕВ.
Суратда: З. Магьамматов.
Автор чыгъаргъан сурат.
