Дагъыстанда айлана якъдагъы сувларда – Каспий денгизде, кёллерде ва шолай да оьзенлерде киринивню болжалы июн айны башларындан тутуп сентяр айгъа ерли узатылагъаны гьакъда белгили. Тюзю, сувукъ сувда да чыныкъгъан тайпалар токъташдырылгъан болжал булан дазуланмай, йыл боюнда кринмеге муштарлы болагъаны да аян.
Сувну, отну ва елни балагьындан Аллагь сакъласын! Яратгъаныбызгъа аманат болуп сувларда аманлыкъны низамын къоруп сакълавгъа да сувукъ-салкъын янашмагъа тюшмей.
Гьали-гьалилерде «Дагестанская правда» деген республика газетни жыйынлар залында болгъан прес-конференция да шолай агьамиятлы темагъа багъышлангъан эди.
Республикабызны маълумат къуралларыны къуллукъчулары булангъы ёлугъувунда Дагъыстанны къыставуллу гьаллар министерлигини сувларда болма имканлы хатабалагьланы алдын алыв булан машгъул болагъан управлениесини баш инспектору Муслим Муслимов оьзюню баянында англатыв ишлени генглешдирмеге ва шону булан дазуланмайлы аманлыкъны чараларын гёрмеге тюшегени гьакъда айрыча эсгерди.
– Сувларда киринегенде, гиччи къайыкъларда, такъталарда юзюгенде алданокъ токъташдырылгъан низамны талаплары булан ювукъдан таныш болув заралны, тас этивлени алдын алмагъа кёмеклешегени гьакъда унутмагъа тюшмей, – деп узатды ол оьзюню сёзюн. Шо гьакъда бизин управлениени къуллукъчулары да пачалыкъ ва жамият къурумлар, ерли гьакимлик къурулувлары, тармакъ министерликлер булан байлавлукъда иш гёре. ДР-ни илму ва билим берив министерлигини сиптечилиги булан гьар тюрлю хатабалгьаланы алдын алывгъа байлавлу болуп йыл боюда токъталмай англатыв ишлер юрюле. Гьали де яшлар охувдан бош заманында ял алыв лагерлерде киринеген ерлерде аманлыкъны низамын сакълавгъа айрыча тергев бакъдырылагъаны гьакъда айрыча эсгермеге сюер эдим.
Белгили болгъаны йимик, бизин регионубузда 200 -ге ювукъ киринеген ерлер-пляжлар гьисапгъа алынгъан. Шоланы барысында да сакълыкъны чараларын гёрювге байлавлу англатыв ишлер юрюле, тийишли чаралар оьтгериле демеге ярай.
Тек не этерсен, бу йыл киринивню болжалы ачылгъандан тутуп июн ва июл айланы ичинде сувларда 14 адам батылгъаны гьисапгъа алынгъан. Яшырмагъа тарыкъ болмай, шоланы арасында яшлар да къаршылашагъаны ичингбушдура. Сувда хатабалагьгъа тарыгъанлардан 18 адам къуткъарылгъаны гьакъда да айрыча эсгериле.
Дагъыстангъа ял алмагъа гелеген туристлени санаву йылдан-йылгъа кёп бола. Аслу гьалда олар ял алмакъ учун оьзлеге онгайлы сув бар бойланы танглай. Шону гьисапгъа алып ерлердеги туроператорланы бьилимлерин камиллешдиривге тергев бериле.
Избербаш, Дербент шагьарларда киринивню болжалларына гёре гьарисинде пляжлагъа дыгъарлашып 5-6 къуткъарывчу заманлыкъгъа ишге алынгъан. Министерликни хас управлениесинде де водолазлар къуллукъгъа алынгъан.
Тек не этерсен, киринивню болжалларында оланы пляжлагъа бегетивню масъаласы къыйын чечиле, етишмей. Айтмагъа сюегеним, шо гьакъда ерли муниципал къурулувларыны башчыларына да теренден ойлшмагъа тюшедир.
Къ. Къараев.
