Таиландда, Чехияда ва Москвада оьтгерилген уллу ярышларда Муслим уьстюнлюклер къазанып къайтгъаны эсибизде. Арабызда ол бугюн ёкъ. Бир намартланы къолундан яшлайын оьлюп гетди.

Белгили спортсменни эсделигине ону ата юрту Ботаюртда гиччи ва оьрюм чагъындагъы яшланы арасында боксдан ачыкъ турнир оьтгерилди. Ярышларда алты команда ортакъчылыкъ этди.

Умуми команда гьисапда «Ботаюртовская» деген яшланы спорт школасыны яш боксёрлары биринчи ерни къазанды. Олар 12 биринчи ерге ес болду. Экинчи ерни Яхсай юртну командасы алды. Яхсайлы боксёрлар беш биринчи ерни къазанды. Бабаюртну командасы эки биринчи ерге ес болду. Хамавюрт ва Эндирей юртланы боксёрлары бирер биринчи ерлер алдылар.

Ярышларда савгъатлы ерлени къазангъанлагъа медаллар ва дипломлар тапшурулду.

– Бизин юртлу аты айтылгъан спортсмен Муслим Абдуллаевни эсделигине багъышлангъан турнирни къурумлу оьтгермек учун къаст этдик. Ярышланы оьтгерме кёмек этген Ботаюртда яшланы спорт школасыны директору Абакар Абуковгъа баракаллабызны билдиребиз. Бизин юртлу айтылгъан спортсменни аты унутулмасын учун шулай оьтгерилеген ярышланы уллу маънасы бар. Ону аты эсибизде даим де яшажакъ. Ярышланы бирдагъы бир пайдасы – олимпия спортну журасы боксну юртларда абуру гётерилегени. Оьтген ярышларда яш боксёрлар яхшы техника ва къастлыгъын гёрсетгенни гёрдюк. Ярышларда Муслимни уланы, 3-нчю класны охувчусу Гьамит Абдуллаев ортакъчылыкъ этди ва савгъатлы ерни къазанды. Къурум комитетни атындан Муслимни атасы Къайсар Абдуллаевге эсделик савгъат да тапшурулду, – деди ерли яшланы спорт школасыны тренери Бийсолтан Атакъаев.

 

 

И. Гьажиев.

Автор чыгъаргъан сурат.