Бабаюртда «Тангчолпан» деген маданият центрында бираз алъякъда оьтгерилген милли йырланы ва бийивлени республика форуму шо бойдагъылагъа бир уллу байрамдай таъсир этгенине шек ёкъ. Алда айтылагъан кюйде, ерли маданият къаласыны залына жыйылгъанлар юртну сагьнасында булай концерт программаланы гёрмегени кёп бола.

Шо гюн Бабаюртгъа форумда ортакъчылыкъ этмек учун жыйылгъан концерт коллективлени арасында оьзлерден къайры дагъы да Хасавюрт, Къарабудагъгент, Хумторкъали, Къызылюрт районлардан, Къызлар ва Къыбла-Сухокумск шагьарлардан гелгенлер де болгъан.

Башлап сагьнагъа чыгъып оьзлени гьюнерин гёрсетме ва шону булан къонакълагъа да ёл ачма деп «Бабаюрт» деген бийив ансамблни ортакъчылары оьзлени пагьмуларын гёрсетген. Бабаюртну халкъ хоруну оьзбашына чалышагъан артистлерини йырлавлары да къаравчуланы рази этген.

М.Бамматхановну атындагъы «Торкъали» деген халкъ хору, Къарабудагъгентден гелген эргишилени халкъ хору, «Тавланы ангы» деген вокал группаны солистлери Райисат Асланова, Алим Абдуллаев, солист Гьабип Хириясулмагьамматов, йыравлар Евгений Егоров, Оксана Ткаченко, Илгьам Искандеров, Тагьир Мустапаев, Земфира Рагьимова ва «Ламан аз» деген фольклор ансамблни солистлери де сагьнада оьзлени гьюнерлерин гёрсетген.

«Гьалиги заман айрокъда халкъны ругьун гётерме тарыкъ. Биз уллу Ватаныбыз Россиягъа бакъгъан сюювню гёрсетеген йырланы кёп иштагьлы кюйде репертуаргъа къошгъанбыз. Оьзгелер де шолай этген. Ондан къайры да, халкъ фольклор – уллу даража. Бизин бир-бир йырларыбызгъа 100 йылдан да кёп бола», – деп эсгере «Торкъали» халкъ хоруну солисти Абдурашит Зиявутдинов.

Бабаюртда оьтгерилген маданият чаралар «Тюзлени тавушу» деген халкъ хоруну йыры булан тамамлангъан.

Форумну ортакъчылары дипломлар ва грамоталар булан савгъатлангъан.