Артдагъы бир нече йылланы ичинде халкъланы арасында ана тилин сакъламакъны масъаласына бек тергев берилеген болуп геле. Неге тюгюл де, оьсюп гелеген наслубуз сабий заманындан тутуп орус тилде сёйлей, шону кёп къоллай. Шогъар да кёп тюрлю себеплер бар.

 Тилни масъаласын гьалиги девюрде янгыз муаллимлер ва адабиятчылар тюгюл, жамият бирлешивлер ва шоланы ёлбашчылары да чечмеге гьаракат этип айлана.

Алдагъы гюнлерде Да­гъыс­тандан хоншу къардаш Къабарты-Балкъар республикагъа интеллигенциябызны вакиллери сапар чыкъдылар. Шо сапарны «Сыкълашыв» деген жамият бирлешивню союзуну Дагъыстан регион бёлюгю гьазирлеген ва онгаргъан эди. Олай да, шо сапаргъа ДР-ни милли сиясат ва дин масъалалагъа къарайгъан­ министерлиги, печат ва маълу­мат агентлиги оьзлени сиптечилигин болдурду.

Оьтгерилген ёлугъувну ас­лу мурады журналистлени ва маълумат къуралланы вакиллерини арасында миллетара масъалаланы айланасында пикру алышдырмакъ эди. Демек, хоншу республикаланы вакиллери бир-бири булан тилни гьакъындагъы оьзлени ойларын айтдылар ва шо гьакъда пикирлешдилер.

Шо сапарда Дагъыстанны делегациясына бизин къумукъ халкъыбызны белгили жамият чалышывчусу, ДР-ни Жамият палатасыны члени, ДР-ни милли сиясат ва дин масъалалагъа къарайгъан ми­нистерлигини эксперт советини уьюрю Абсалитдин Мурзаев ёлбашчылыкъ этди. Олай да, ёлугъувда журналист ва Россияны язывчуларыны союзуну члени Багьавутдин Узунаев, РФ-ни Илмулар академиясыны Дагъыстан илму-ахтарыв центрыны фольклор бёлюгюню ёлбашчысы Агъарагьим Солтанмуратов, Къарабудагъгент районда чы­гъа­рылагъан «Районну яша­ву» деген газетни баш редак­торуну заместители, шаирлер Ба­гьавутдин Саматов ва Зарема Сулейманова оьзлени ортакъчылыгъын болдурдулар.

Ачыкълашдырып айтсакъ, «КБР-медиа» деген пачалыкъ идараны ёлбашчысы, орунбасары Тамерлан Холаев ва олай да «Кабардино-Балкарская правда», оьзге республика газетлени баш редакторлары Ранета Бжахова, Гьасан Къонакъов ва Завурбек Жилясов къонакъланы арив къар­шыладылар.

Ёлугъувну башында Абса­литдин Мурзаев сапарны аслу мурадын аян этди. Демек, халкъны арасында ватандаш­лыкъ бир­лешивню, кёп миллетлер яшайгъан республикада миллет аралыкъланы сыкълашдырмакъны, маълумат къуралларда ана тиллени сакъламакъны ва оьсдюрмекни, олай да тарихге, яшайгъан­ ерине гёре иш тутмакъны гьакъында мекенли кюйде ачыкъ этип айтды.

Ёлугъувда филология илмуланы кандидаты Агъарагьим Солтанмуратов ана тиллени бугюнгю гьалы гьакъда генг кюйде маълуматлар берип сёйледи.

Журналист Багьавутдин Узунаев оьзюню сёйлевюнде ватандашлыкъ бирлешивю-ню айланасында пикру алышдырды. «Районну яшаву» газетни баш редакторуну орунбасары Багьавутдин Саматов буса оьзюню сёйлевюнде Къарабудагъгент район­да аслу гьалда къумукъ ва дарги миллетлени вакиллери бир-бири булан кёп асруланы боюнда татывлукъда ва дослукъда яшайгъаныны гьакъында айтды.

Оьтгерилген ёлугъувну ба­рышында Къабарты-Балкъар республика газетлени баш редакторлары да гётерилген масъалалагъа гёре оьзлени пикирлерин эсгердилер. Демек, олар да бизин дагъыстанлы алимлер, жамият чалышывчулар, шаирлер, журналистлер, муаллимлер тилге ва дослукъгъа байлавлу гётереген масъалалар гьалиги заманда лап да тарыкълы ва агьамиятлы деп гьисап этегенин ташдырды. Ёлугъув­ну гьасиллерин чыгъарып, Та­мерлан Холаев ва Абсалит­дин Мурзаев сёйледилер. Олар оьзлени сёйлевлеринде булай сапарланы узатмакъны ва дослукъ аралыкъланы мердешлендирмеге гереклигин ачыкъ этдилер.

 

Багьавутдин САМАТОВ.