Бугюнлерде «Дагестан» деген телерадиокомпанияда «Газлашдырывгъа кёмеклешив» деген программаны талапларын яшавгъа чыгъарывгъа байлавлу болуп ДР-ни энергетика ва тарифлер министерлигини башчысы Марат Шихалиевни прес-конференциясы оьтгерилди.

– Оьзлени яшавлукъ шартларын яхшылашдырывгъа байлавлу болуп юрюлеген гьаракатда дагъыстанлылар актив кюйде ортакъчылыкъ этегени разиликни тувдура, – деди Марат Шамильевич. – Эсгерилген программа пайдаландырывгъа берилгенли толу уьч йыл да болмай. Шогъар да къарамайлы, табии ягъарлыкъ газдан пайдаланмагъа муштарлы къоллавчуланы янындан 6358 арза гелген. Озокъда, шоланы яшавгъа чыгъарывну низамын бузмай къабул этмеге ва къуллукъларын яшавгъа чыгъармагъа тюше. Тек, арзаланы 976-сы есилерине къайтарылгъан. Неге десегиз, оланы документлерини жыйымларында кемчиликлер къаршылаша. Адамлар топуракъ пайларына ва топуракъда ерлешген малына-мюлкюне тийишли шагьатнамаланы онгармай, айсениликге бойсына…

Белгили болгъан кюйде, алда газ тарчыв ишлени болжаллары токъташдырылгъан эди. РФ-ни Президенти Владимир Путинни сиптечилиги булан гележекде кёмеклешив ишлени болжалы токътатылмай оьтгерилежек.

Бу йылны башындан тутуп, эсгерилген программагъа билим берив ва савлукъ сакълав тармакъны идараларына да къошулмагъа имканлыкълар яратылынды. Арадан оьтген вакътини ичинде арза бергенлени 2600-не газ тартмагъа ихтияр берилгени гьакъда да айрыча эсгермеге тюше. Шоланы арасындан 1140 уьй есилери онгайлы табии газ ягъарлыкъдан бугюнлерде пайдаланып да тура.

Газтартывгъа кёмеклешив муниципал къурулувларында оьтгериле. Дагъы да ачыкъ этип айтгъанда, газ быргъылар харлыланы абзар алдына ерли тартыла. Уьйлени ичиндеги быргъыланы ва газ алатланы ерлешдирив-ясандырыв уьй есилерини харжына этилине.

Эсгерилген программадан пайдаланагъанлагъа енгилликлер этилинеген ёллары ва къайдалары белгили. Шо гьакъда эсгерилген министерликни сайтында толу англатыв маълуматлар да ерлешдириле. Аслу гьалда уьйлени ичлерине газ тартылгъан сонг енгилликлерден пайдалангъанлагъа 100 минг манатны оьлчевюнде къайтарыш бериле. Шону учун акъчасы ёкълар бу йылны март айындан тутуп, харжны алданокъ алмагъа да болажакъ.