Эки де командада янгы футболистлени кёплюгю ва сезонгъа командалар уьч жума тюгюл гьазирлик гёрюп болмагъаны «Анжи Аренадагъы» оланы биринчи оюнуна къарагъандокъ гёрюне эди. «Анжини» гетген йылгъы аслу сос­тавындан футбол майдангъа 3–4 футболист чыкъды. «Сахалинни»  буса жагьил футболистлерини кёбюсю милли лигада биринчи оюнун ойнай эди.

Оюнну башындан тутуп, «Анжи» сахалинлилени оьзлени къапусуна къысма башлады. «Сахалин» буса, болагъан кюйде къапусун да якълап, амал болса, гери чапгъынлар да этмеге гьазирлигин гёрсете туруп биринчи таймны яртысы гетди. Биринчи къоркъунчлу мюгьлет бизин къапуну янында Тагьирбековну хатасындан тувду, тек Кержаков топну гери уруп, сахалинлилени мюгьлетден пайдаланма къоймады.

33-нчю минутда «Анжини» чапгъынчысы Шамил Асилдаров, «Сахалинни» штрафноюна артын берген кюйде пас алып, оьзюню артында токътагъан якълавчулардан алдынлыкъ этип, хапарсыздан «Сахалинни» къапусуна урду. Къапучу Самохвалов нечакъы созулуп атылса да, топну токътатып болмады – 1–0.

Шу санав булан биринчи тайм битди. Танапус битип, экинчи таймны башындан тутуп, ахырына ерли Каспийскидеги «Анжи Аренада» янгур токътамай явуп турса да, оюнну сураты алышынмады. «Анжи» уьч-дёрт къоркъунчлу мюгьлетни къолдан чыгъарды, «Сахалинни» де болду бир нече къоркъунчлу гери чапгъынлары, тек оюнну санаву алышынмады.

Голну автору Шамил Асилдаровдан къайры, «Анжини» составында Амаду Мутари, Али Гьажибеков, Валерий Кичин ва Илья Максимов яхшы ойнады. Алдын бизин «Анжиде» ойнагъан Зураби Арзиани бу оюнда «Сахалинни» составында кёп арив оюн гёрсетди. Бизде «Анжиде» тарбиялангъан, футболист болгъан къумукъ улан Элдар Мамаев де – бугюн «Сахалинни» якълавчусу, Элдар чы – гьатта оланы лидери, сав оюнну бир хатасыз оьтгерди.

Оюн битгенде болагъан прес-конференцияда  бизин баш тренер Сергей Ташуев биринчи оюнгъа разилигин билдирди. «Биз футболистлени танглавну масъаласыны уьстюнде ишлейбиз, команда премьер лигагъа гелеген йыл къайтма герек», – деди.

«Сахалинни» баш тренери Фаиль Миргалимов да 1–0 санав булан утдурулгъан оюнгъа, кююне къарагъанда, онча къарсаламай эди. Команда кёп жагьил, команданы гележеги бар», – деген затны айтма сюйдю.

Хамисгюн, 10-нчу июльда, ахшам 18 сагьатда «Абу-Даги» гостиницада «Анжини» къаравчуланы футболистлер ва тренер составы булан ёлугъуву болажакъ. Бизин охувчуланы арасында шо ёлугъувгъа гелме сюеген адам бар буса, гелмеге бола.

«Анжи» экинчи турну оюнун да уьйде, оьз майданында он экинчи июльда ойнай.

 

 

 

Ш. Кишиев.