Кёкюрек аврув дюньяда лап да бек яйылгъан югъагъан ва къоркъунчлу аврувланы бири деп гьисаплана. Адамлар заманында савлугъу­ну гьайын этип, тергевлерден чыкъмаса, артда шону сав этмеге къыйын бола.

Шо янларын да гёз алгъа тутуп, алдагъы гюнлерде Москвадагъы фтизиопульмонология милли ахтарыв медицина центрдан (НМИЦ) Дагъыстангъа делегация гел­ген эди. Олар Дагъыстан Рес­публиканы Гьукуматын­да ёлугъув оьтгердилер. Шонда Дагъыстанны Гьуку­матыны Председателини за­местители Мурат Казиев,­ Дагъыстанны савлукъ сакълав министри Татьяна Беляева, Медицина университетни ректору Висампаша Ханалиев, Дагъыс­танны Халкъ Жыйыныны сав­лукъ сакълав комитетини председатели Ильяс Мамаев ортакъчылыкъ этдилер.

Москвадан гелген врачлар, специалистлер Магьачкъаладагъы, Буйнакскидеги, Дербентдеги медицина учреждениелеге барып, кёкюрек аврувгъа къаршы юрюлеген ишлени гьакъында пикруларын айтып, пайдалы лакъыр болгъан.

Олар Дагъыстандагъы врачлагъа, иш ёлдашларына къурумчу-методика ва наси­гьат якъдан кёмек этмеге гелген эдилер.

Ёлугъувну натижаларын чыгъара туруп, врачлар-касбучулар кёкюрек аврувланы багъагъан къуллугъуну энниден сонг да оьсювюню ёлларыны, республиканы районларында ва шагьарларында лаборатория, рентгенология аппаратлар булан янгыртмакъны гьакъында белгилегенлер.

Делегацияны ортакъчылары Дагъыстанны савлукъ сакълав министерлиги Къызылюртдагъы кёкюрек аврувланы багъагъан диспансерге янгы диагностика аппарат салгъанны, Республика кёкюрек аврувланы багъагъан диспансерге де къайда да алып барма болагъан рентген аппаратны, башгъа хас эндоскопия ва рентгенология ясандырывланы, микроскопланы бергенге яхшы якъдан багьалагъан.

Артдагъы заманларда аты эсгерилген диспансерлерде ашы-суву къолайлашгъандан къайры, дарманлар булан таъмин этилегенлик де яхшылашгъан. Шолар да кёкюрек аврувну янгы билинип гелеген вакътисин токъташдырып, багъып, авруйгъанланы санавун тёбенлешдирмеге имканлыкъ бере. Тек врачлар-касбучулар, федерал экспертлер белгилеген кюйде, кёкюрек аврувланы багъагъан къуллугъуну ишин оьсдюрмек учун дагъы да хыйлы гьаракат этмеге ге­рекни гьакъында билдиргенлер.

 

П. ГЬАЙБУЛЛАЕВА.