Къардаш Тюркияда яшайгъан къумукъланы арасында яш спортчу Бушра Мутай деген къумукъ къыз барны билгенде,  биз де сююндюк. Бушра Тюркиядагъы Чанаккале деген шагьарда Нуман Мутайны агьлюсюнде тувгъан. Нуман Мутайны аталары 150 йыл алъякъда Дагъыстанны Агъачавул юртундан Тюркиягъа гёчюп гетген. Олар Тюркияда яшаса да, аталарыны ватанындагъы къумукълар булан гьаллашып, къурдашлыкъ юрютмеге бек гьасирет. Шолай байлавлукъну да олар Интернетни кёмеклиги булан юрютме къаст эте.

Бушра яш заманындан берли спорт булан машгъул болмагъа башлагъан. Орта охув ожакъны битдирген сонг Истанбулдагъы Мармара университетни спорт факультетин битдирген. Спорт булан машгъул заманындан берли, Бушраны гьар тюрлю чемпионатларда къазангъан 70-ден де артыкъ медалы бар. Бушра Мутай спортну  узунлукъгъа атылыв спортну журасындан бир нече керен Тюркияны чемпиону болгъан, Балкан пачалыкъланы арасында оьтгерилеген ярышларда буса савгъатлы ерлени алмагъа бажаргъан.

Тюркияны «Фенербахча» клубуну спортчусу гьисапда сентябр айны 3-нде Анкарада оьтгерилген Тюркияны чемпионатында Бушра бу гезик де чемпион болмагъа бажаргъан. Бу гезик Бушра 5.83 метр узунлукъгъа атылып, ярышларда ортакъчылыкъ этген башгъа спортчулардан уьст гелген.

Бушра гьали  2016-нчы йылда оьтгерилежек Олимпия оюнлагъа гьазир бола. Оьзю де эсгерген кюйде, олимпия оюнланы  чемпиону болуп, Тюркияны байрагъын тутуп юрюме хыялы бар. Етишген уьстюнлюгю булан Бушраны гьакъ юрекден къутлай туруп, гележекде дагъы да уллу уьстюнлюклеге етишмекни, оьзюню инг уллу хыяллары яшавгъа чыкъмакъны ёрайбыз. Къардаш Тюркияны чемпиону къумукъ къыз Бушра булан оьктем болмагъа бизин де гьакъыбыз бар!

 

 

П. БЕКЕЕВА.