Татарстанны тахшагьарында июн айны бешинден он бири болгъанча тюрк халкъланы «Навруз» деген он алтынчы Халкъара театр фестивалы оьтгерилди. Шонда савлай Россиядан, Тюркиядан, Къазахстандан, Уьзбекистандан ва Къыргъызстандан бир мингден де кёп артистлер ортакъчылыкъ этген.

Бизин А-П. Салаватовну атындагъы Къумукъ музыкалы-драма театрыбыз Чингиз Айтматовну пьесасына гёре салынгъан «Денгиз бойлай чаба гёбек ит» деген спектаклни гёрсетген. Бу спектаклни къумукъчагъа шаир Супиянат Мамаева таржума этген.

Спектаклни ачылывунда онда баргъан къумукъ делегацияны ёлбашчысы Скандарбек Тулпаров сёйлеген:

– Къазан шагьар тюрк миллетлени маданият тахшагьары йимик гьисапланып тезден берли юрюле. Бизин Къумукъ театрны репертуарында кёп йылланы узагъында юрюлюп турагъан спектакллер бар. Заман гетсе де, къаравчулар оланы кёп сююп къабул эте. Биз олар булан оьктем болабыз. Олар−бизин «алтын фондубуз», – деген ол. Фестивальны ёлбашчылары ону сёйлевюне тергев берген. Гелеген йыл оьтгережек фестивальны театрланы «алтын фондундагъы» спектакллер булан оьтгережекни айтгъан. 25 йылны узагъында юрюлюп турагъан спектакллер шо фондгъа гире деп токъ-ташдыргъан.

Шону учун болма ярай, оьтгерилген фес­тивальны гьасиллерин чыгъарагъанда, Къумукъ театр гёрсетген спек­такль лап да яхшы ойналгъан 5 спектаклни арасына къошулгъан. Фес­тивальда ортакъчылыкъ этген артистлени кёплери театр инчесаният тармакъда етишген уьстюнлюклери учун савгъатлар ва дипломлар алгъан. Айрокъда Дагъыстанны ат къазангъан артистлери Пахрутдин Ихивовну, Темирлан Умаевни, Элдар Магьамматовну оюнун, сагьнадагъы гьаракатын, бажарывлу кюйде келпет яратып болгъанын къаравчулар харс урувлар булан къаршылагъан ва баракалласын билдирген.