11-нчи апрелде Къарабадагъгентдеги «Юлдуз» деген яшлар бавунда гиччипавланы ортакъчылыгъы булан «Космосгъа сапар» деген Косманавтиканы гюнюне багъышлангъан ачыкъ дарс оьтгерилди.

Тарбиялавчу Элмира Абдуллаева яшлагъа олар англайгъан кюйде космос не экенни, кёкге учгъанланы, башгъа дюньяланы гьакъында айтды.
Биринчи космосгъа бизин уьлкебизден Юрий Гагарин учгъанны гьакъында да хабарлады.

Яшлар космосгъа учувну гёрюнюшлер этип гёрсетдилер, телевизордан космону гьакъындагъы англатыв дарсгъа тынгладылар. Сонг оьзлер ойлашгъан космос геме булан дюньяны айланды, балагьгъа тарыгъан «Альфа» дюньядагъы адамланы къутгъардылар. Сонг гьава гемесин сав-саламат яшлар бавуну абзарына къондурдулар.

Дарсны ахырында яшлар соравлагъа жаваплар бердилер, инг де яхшы жавап къайтаргъанлагъа космосну гьакъындагъы китаплар савгъат этилди.