Нарыста тувгъанда, гьар ожакъда бир уллу байрам йимик сююнч бола. Бир тигим яшны ата-анасы, дос-къардашы алма-салма ер тапмай, къоралап сакълама къарай. Нечакъы гьайын этсе де, бу дюньяны ярыгъын гёрюп битгенче де,   гиччипавлагъа да коронавирусну учгъунлары тиймей къалмады.

Муну эсгерегеним, гетген йыл пандемия башлангъанда, коронавирус инфекция юкъгъан, яшгъа токътагъан къатынланы Каспийскдеги яшлар табагъан больницагъа ерлешдире эдилер. Оланы дагъы бир ерде къабул этмей эди. Аналаны да, нарысталаны да яшавуна нечакъы къоркъунчлукълар тувулунду. Амма къыйынлыкълар болса да, пандемияны вакътисинде шо медицина идарада эсен-аман 220 яш тувгъан.

Аты эсгерилген, Каспийскдеги яшлар табагъан больницада 50, 70 процентге оьпкелери зараллангъан яш тапмагъа аз заманы къалгъанланы нече керен де къутгъаргъан гезиклер де болгъан.

Гьали де, пандемияны яйылывуну 3-нчю тиретинде де шонда 120 яш тувгъан. Врачлар айтагъан кюйде, коронавирусну 3-нчю «толкъунунда» яшгъа авур къатынлагъа шо намарт аврув югъуп, бек осал гьалында больницагъа тюшгенлеге кёмек этип, аякъ уьстге салмагъа бажаргъанлар. Коронавирус халкъгъа къабунмагъа башлагъан заманны ичинде 4 къатын эгизлер тапгъан.