Эндирейден Украина бойдагъы хас асгер гьаракатда онлар булангъы жагьиллер ортакъчылыкъ эте. Шоланы кёплерине пачалыкъ савгъатлар да берилген.

 

Алдындагъы гюн юртлулар, шоланы арасында муаллимлер, депутатлар ва охувчу яшлар, эсгерилген агьавалатларда ортакъчылыкъ этеген ва къысгъа болжалгъа уьюне йиберилген Артур Салавовну ва Залимхан Гьасанхановну къаршылама юртну башына чыкъдылар. Эки де улан хас асгер гьаракатгъа гёнгюллю кюйде гетген эди. Залимхан шо гьаракатда бир керен ортакъчылыкъ этип гелди. Яраланып уьйге йиберилди, тек къолай болгъандокъ, янгыдан къайтып гёнгюллю кюйде асгерге гетди. Шону булан бирге гетген Артур да ону булан янаша къуллукъ эте эдилер.

Буланы асгер бёлюгюне хас тапшурув берилгенде, шону кютме гетген бир-нече яш яралана. Шоланы оьлюмден къутгъармагъа эндирейли уланлар чыгъалар ва тезликде къоркъунчсуз ерге чыгъарма башлай. Ахырынчы яшланы чыгъарагъанда буланы къыры­йында да топ атыла ва эки де улан яралана. Яралыланы ва оьзлени яраларын байлап кёмек гелгенче тарыкълы къуллукъланы этип тура. Шо игитлиги ­саялы эки де улан «Къоччакълыгъы учун» деген медаллар булан савгъатлангъан.

Госпитальдан сонг дос-къардашын гёрме къысгъа болжалгъа уьюне йиберилген. Оланы игитлиги булан сав юрт оьктем болагъанны айта туруп, юрт­ну башчысы Ирази Абсаламов эндирейлилер гьар заманда да игитликге айтыла гелгенни ва бугюнгю уланлар шоланы къоччакъ ишлерин давам этегенни гьакъында билдирди.

Артур ва Залимхан бираз уьюнде де туруп, асгер ёлдашларыны янына гетежек. Узакъ къалмай олар уьстюнлюк алып къайтажакъгъа шеклик этмейбиз.

 

Бизин мухбирибиз.