Москва шагьарда ВДНХ-ны янында «Россия» деген халкъара-выставка форумунда охувчуланы Бютюнроссия конкурсуну ортакъчыларын къутлавгъа байлавлу чара оьтгерилди. Умуми кюйде алгъанда шо конкурсда Россияны 21 регионундан гелген 32 команда ортакъчылыкъ этди. Юрт хозяйство ва фермерчилик тармакъда оьз пагьмуларын гёрсетмек учун уьлкени тахшагьарында 14 йылдан 18 йылгъа ерли чагъындагъы яшёрюмлер оьзлени пагьмуларын аян этдилер.
Конкурсда алдынлыкъны алгъанланы савгъатлавда ону ортакъчылары Россияда ва Белоруссияда агрокласланы артдырывгъа байлавлу чарада ортакъчылыкъ этдилер.
Сонг олагъа юрт ердеги яшёрюмлени союзуну ёлбашчысы, Пачалыкъ Думаны депутаты Юлия Оглоблина видеодан таба билдирив этди. Юлия оьзюню сёлевюнде юртлу яшёрюмлени пагьмуларына оьр багьа берди ва олагъа оьзлер танглагъан тармакъны оьсдюрювде уьстюнлюклер ёрады.
Финалгъа чыкъгъан командаланы арасында 4 команда оьзлени гьаракатын айрыча болдургъан. Шоланы арасында Рязан, Мурманск,Тамбов областлардан ва Дагъыстандан гелген бир команда бар. Хумторкъали районну Шавхал Янгыюрт орта школасыны охувчуларыны теплицада розаланы оьсдюрювге байлавлу сиптечилигин жюрини ортакъчылары якълады.
Конкурсда алдынлыкъны алгъанлагъа эсделик дипломланы, савгъатланы ва Баракалла кагъызланы тапшурувда юрт ерде яшайгъан яшёрюмлени союзуну председатели, Жамият Палатасыны ортакъчысы Дмитрий Пекуровский, «Россельхозбанкны» правлениесини ёлбашчысыны ойчусу Любовь Белеску ва юрт ерде яшайгъан яшёрюмлени союзуну Центральный Советини бюросуну ортакъчысы Пачалыкъ Думаны депутатыны кёмекчиси Наталья Федякова ортакъчылыкъ этди.
Олар ерлерде яшёрюмлени юрт хозяйство тармакъда, шону янында далапчылыкъгъа бакъгъан якъдагъы гьаракатына агьамият берме тюшегенин ташдырып айтды.
Конкурсну финалында Хумторкъали районну Шавхал Янгыюрт орта школасыны охувчулары Гьажиали Мусаев ва Азиза Акъаева «Долина роз» деген бизнес-планын якъладылар. Эсгерилген проектни маънасы – школада теплица комплекс къурмакъ. Шавхалянгыюртлу охувчулар «Гьар яшны уьстюнлюгю» деген федерал проектни алатларын къолладылар.
Юртлу охувчулар Гьажиали Мусаевни ва Азиза Акъаеваны насигьатчылары Зиярат Жапарованы ва Айханум Мусаеваны къасты негьакъ болмагъаны гёрюнюп тура. Биз де оьз гезигибизде юртлу охувчуланы ва оланы муаллимлерин бу уьстюнлюк булан къутлай туруп, олардан энниден сонг да дагъы уллу оьрлюклер къаравуллайбыз.
Алибек САЛАВАТОВ.
