Бабаюрт районну Герменчик юртлусу Измудин Гьажиев «Каспий» деген гёнгюллю батальонуна гиргени гьакъындагъы хабар юртгъа яйылып, халкъ арада бирдагъы бир къоччакъ ватанын якъламагъа гетегени белгили болду. Ол оьзю де эсгерген кюйде, батальонгъа ону гирмеклигини аслу себеби – миллетчилерден уьст болмакъ.
«Мени ювукъ адамларым, дос-къардашым, озокъда, къаршылыкъ билдирген эди. Тек мен шо масъаланы оьзюм чечмеге токъташдым. Ватанны, халкъыбызны уьстюне къоркъунчлукъ тувулунгъанда, ягъада къарап болмадым», – дей ол.
Бугюнлерде Измудин оьзю къуллукъ этежек асгер бёлюкге етишген. Ону ювукъ адамлары, дос-къардашы, юртну халкъы игитни йимик узатдылар. И. Гьажиевни атына исси сёзлер айта туруп, Бабаюрт районну ёлбашчысы Даниял Исламов да огъар яхшы ёл ёрады.
«Измудин Абдуллаевич, биз сени сав саламат гелер деп къаравуллайбыз. Сени ва асгер ёлдашларынгны Аллагь сакъласын, ёлугъуз ярыкъ ва барыгъызгъа да сююнюп къайтма насип болсун», – деди ол.
Измудин Гьажиев узакъ йыллар район администрациясында ишлеген. Ол башлап комендант, артдагъы 8 йылны ичинде буса районну администрациясыны хозяйство центрыны ёлбашчысыны орунбасары болуп чалышды.
Герейхан ГЬАЖИЕВ,
оьз мухбирибиз.
СУРАТДА: Измудин Гьажиев
