13-нчю декабрде Къарабудагъгент районну ёлбашчысы Магьмут Амиралиев, Избербаш шагьарны, Къаягент ва Къарабудагъгент районланы военкому Дайитбек Шагьбанов булан Донбас бойда хас асгер гьаракатларда жанын къурбан этген яшланы ата-аналары ва дос-къардашы булан ёлукъду. Шолай, гёрсетген игитлиги оьр даражада къыйматлангъан Зеленоморскиден – Сулейман Сулейманов, Сирагиден – Магьамматдагьир Магьамматов ва Къарабудагъгентден Уллубий Сурхаев оьлген сонг Къоччакълыкъ орденлер булан савгъатлангъан.

Къарабудагъгент районну башчысы Магьмут Амиралиев ата-аналарына орденлени тапшура туруп, гьар агьлюге не кёмек тарыкъ буса, шону кютежекге администрация оьзюню бойнуна алагъанны да эсгерди.

– Сиз герти къоччакъ ва намуслу уланланы тарбиялагъансыз, шону учун кёп савболугъуз, оланы атларын даимлешдирмек учун чаралар да гёрюлежек, – деди ол. – Не масъала болса да, сюйсе о иш булан таъмин этив болсун, яшланы масъалалары болсун, барын да кютежекбиз. Мен администрацияны атындан дагъы да сизге къайгъырышывларымны билдиремен. Аллагь оланы гюнагьларындан гечсин ва женнетлени къапулары ачыкъ болсун!