Къаягент районну Герга юртунда уллу кёл бар. Яй айларда мунда айланадагъы табиатдан сукъланагъандан къайры, балыкъ тутма да кёп туристлер геле. Тек къайсы сувда да, терен болсун, сай болсун, сакъ турмакъны гьакъында бир де унутмагъа ярамай.

 

Кёлню ягъалары бетон плиталар булан беклешдирилген, шо саялы тайгъалап ичине тюшюп гетмекни юртда уллулар да, яшлар да яхшы биле. Амма ноябр айны 15-нде агъа-ини  5 йыллыкъ Халит Къадиев ва ону 7 йыллыкъ сакъат агъасы Абдулла неге буса да сакъ турма унутгъанын гьали айтмагъа къыйын.

Олар кёлню ягъасы булан гезей туруп, бир мюгьлетде хапарсыздан экиси де сувну ичине тюшгенлер. Сувну иссилиги буса, 13-15 градусдан артыкъ тюгюл. Насипге оланы кёмекге чакъырагъан къувунлу тавушун ювукъдан оьтюп барагъан ерли школаны охувчулары 15 йыллыкъ Абдуллабек Загьирбеков ва 13 йыллыкъ Гьапиз Исакъов эшитгенлер. Къоччакъ яшлар адашмай, къырыйындагъы бавдан узун резин шлангны алып, агъа-иниге сувгъа  ташлагъанлар. Шону кёмеги булан олар аман кюйде ягъагъа чыкъгъанлар.

 

Алав АЛИЕВ.