Тилни, адабиятны ва инчесаниятны институтуну директору, профессор Магьаммат Магьамматов гиришив сёзюнде шаирибизни гьакъында айта туруп, ону яратывчулугъуну гьар тюрлю якъларына байлавлу докладлар онгаргъан алимлеге сёз берди.

Анвар Гьажиевни яшав ва яратывчулукъ ёлуна байлавлу филология илмуланы доктору Малик Гьюсейнов доклад этди. Ондан сонг юбилярны яратывчулугъуну гьар тюрлю янларын ахтаргъан алимлер, профессорлар Абдулгьаким Гьажиев, Камил Ханмурзаев, Разият Агьматова сёйледилер.

Докладлардан сонг чыгъып сёйлегенлер, шаирни таныгъанлар, иш аралыкълар, яратывчулукъ аралыкълар, дос аралыкълар юрютгенлер ону яшавундан, ону булан болгъан ёлугъув­лардан жыйылгъанланы эсинде къалардай мюгьлетлени эсгерди.

Дагъыстанны халкъ шаири Магьаммат Гьамитов Анвар къуруп, ясап гетген дагъыстан радиокомитетде ону ишин узатгъаныны гьа­къында хабарлады. Россияны илмулар академиясыны член-корреспонденти Агьмат Османов Анварны къызы булан уьйленип, оланы тухумуна къошулгъан кююн айтды. Дагъыстанны язывчуларыны союзуну правлениесини председатели Магьаммат Агьматов Анварны таныгъан кююню ва ону яратывчулугъуну гьакъында эсгерди. Дагъыстанны халкъ шаирлери Агьмат Жачаев ва Шейит-Ханум Алишева оьзлени яратывчулукъ ёлуну башында Анвар этген кёмекни ва таъсирни гьакъында айта туруп, огъар багъышлангъан шиъруларын охуду. РФ-ни маданиятыны ат къазангъан чалышывчусу Ислам Казиев Анваргъа къардаш болагъанын ва ол таржума этген пьесаланы сагьнада салгъан кююн айтды. Дагъыстан китап издательствону редактору Бадрутдин Магьамматов ва шаир Исрапил Исаев Анварны яратывчулугъуну гьакъында айта туруп, ону шиъруларына гёре йырлап да алдылар. «Тангчолпан» журналны редактору Супиянат Мамаева да халкъ шаири, юртлусу Анварны яратывчулу­гъундан илгьам ва дарс алгъанны гьакъында хабарлады. Сёйлевлени аралашдыра туруп, бизин белгили йыравларыбыз Бурлият Элмурзаева, Зоя Чунаева, Зайнап Абсаматова Анвар Гьажиевни йырларын йырлап, жыйылгъанланы гёнгюн алды.

Илму сессияны ахырында Анварны уланы шаир Багьавутдин Гьажиев атасыны гьюрметин этип гелгенлеге ва ону яратывчулугъуну гьакъында сёйлегенлеге гьакъ юрекден разилигин билдирди.

Я. Бийдуллаев.

Суратда: сессияны вакътиси.