– Мен Грозныйны юрт районуну Виноградное (Бамматюрт) деген юртунда 1953-нчю йыл тувгъанман. 1971-нчи йыл шо юртда он класны битип, Назрань юрт хозяйство техникумну бёлюгюне тюшдюм. Заочно охуй туруп, «Загорский» деген совхозну 2-нчи бёлюгюне ишге тюшмеге бардым. Мени тувар фермагъа бригадир этип белгиледилер. Бажармасман деп нечакъы да тартындым, неге тюгюл шо бригада социалист ярышларда артда къалгъан бригада эди.
Аллагьны яхшылыгъындан, оьзюмню де уллу иш къастлы янашывум кёмек этди буса ярай, бир де гёзленмеген кюйде ишим юрюп гетди. Шо йыллар айлыкъ, квартал, ярым йыллыкъ ва йыллыкъ планлар бериле эди. Гьайван башгъа гёре эт план бериле эди. Бираз вакъти гетип, грамоталар, савгъатлар алып башладыкъ. 1975-нчи йыл буса, загьматда етишген уьс­тюнлюклерим саялы, магъа «Коммунист загьматны ударниги» деген гьюрметли ат берилди. Мен булай уьстюнлюклеге етишмекге ата-анамны уллу иш гьайлы тергевю кёмек этди: «Вёре, вёре, балам, эринме! Бетинг ярыкъ болгъанны сюе бусанг, эринме! Загьмат гьалаллыкъны сюе. Янгыз сени къастлы гьаракатынг сени абурунгну-сыйынгны гётережек гючдюр!» – деп уьйрете эдилер. Атам, анам оьзлер де шо совхозда кёп йыллар ишлеген адамлар эди. Анам кёп керенлер ерли советге депутат этилип, районну халкъ судуну заседатели этилип сайлангъан, жамиятны гьар къайсы ишинде де актив кюйде ортакъчылыкъ этген адам эди. Атам да яшлай анасы булан янгыз къалып, яшавну загьмат ва дав «университетлеринден» оьтюп, гьатта Япон давда да ортакъчылыкъ этип, пачалыкъны хыйлы савгъатларын да, авур-авур яралар да алып къайтгъан эди. Биз агьлюде уьч уланкъардаш ва уьч къызардаш бар эдик. Барыбызгъа да ата-анабыз билим алма имканлыкълар да яратды. Мен олагъа да, биринчи муаллимим Наталья Семёновна Ибрагьимовагъа да ва башгъа муаллимлериме де уллу иш разимен ва баракалла билдиремен, олар берген пайдалы насигьатлар мени яшавумда кёп табылгъан. Генг кюйде белгили къыргъыз язывчу Чингиз Айтматов тюз язгъан: «Гележекде болажакъ ватандашны тарбиялавда муаллимни ролю нечакъы да уллу экен».
Къасткъылып ишлей де туруп, охуп техникумну битдим. 1974-нчю йыл район советге депутат этип айырылдым. 1976-нчы йыл экинчи керен де депутат этип сайладылар. Шо йыллар Мычыгъыш-Ингуш АССР-ни Оьр Советини Президиумуну члени этип де айырдылар. Бир вакъти ишден айрылмагъа тюшдю, яшлар кёп гиччи эди. Сизин бетигизни Аллагь сыйласын, уьч къызым бар.
1982-нчи йыл Грозныйда комбинат ачылды. Яшлары булан уьйде турагъан тиштайпалагъа шо онглу иш эди. Ону юртларда бёлюклери (филиаллары) де бар эди. Мен ишге тюшмеге баргъанда, мени Виноградноеде ишлейген тиштайпаны бригадасына учётчик этип белгиледилер. Тиштайпалар синтетика юнден тастарлар, капюшонлар эте эдилер, мен гьисабын юрюте эдим.
1991-нчи йыл шо комбинат «Демис» деген гиччи предприятиеге айланды. Сонг мени Виноградное ва Борагъан участкалагъа мастер этип белгиледилер. Бу ишде де социалист борчларыбызны артыкъ этип толтуруп, ишим онгарылды. Гертиден де, къаст булан бола адамны бети ярыкъ да, сыйы оьр де. Хыйлы грамоталар, баракаллалар, савгъатлар берилди, гьатта цехкомну председатели этип айырдылар.
1986-нчы йыл «Къайратлы загьматы учун» деген медаль булан да савгъатладылар. Шо сыйлы савгъатгъа мен лайыкълы болуп да битмес эдим, эгер де Виноградное участкадагъы Разия Межитова, Патимат Элбуздаева, Элза Эдилбиева, Сина Сугаипова, Яхита Элбуздаева, Разия Автаева, Загьра Кунтуева ва Борагъан участкадагъы Айшат Муслимова, Бараат Инуева, Барият Хураяева, Шарипат Чакъаева, Салийта Буцумова, Разия Магьамматова ва башгъалары намуслу ва ягьлы ишлеп, планларын артыкъ этип толтургъанлар болмагъан эди буса. Олагъа мен гьакъ юрекден рази­лигимни билдирип, баракалла айтмагъа сюемен.
1994-нчю йыл Мычыгъышда башлангъан дав агьвалатлагъа байлавлу болуп «Демис» деген гиччи предприятие де ябылды.
Бугюн мен пенсиядаман, балаларымны балаларындан къуванып яшайман. Жумада бир керен гелеген бизин къумукъ газетибиз «Ёлдашны» аламан. Ону бары да бетлерин уллу иштагь булан охуйман. Не яхшы ишдир бизин ана тилибизни сёнмеге къоймай, гёзел тарихибизни билдиреген, адабиятыбызны, инчесаниятыбызны оьсювюнден англав бермеге булай терен билимли газетибиз бары! Сизге, газетибизни бары да къуллукъчуларына, бизин халкъ учун уллу иш сыйлы ишигизде уллу уьстюнлюклер, яхшы савлукъ ёрайман.
Сизге гьюрмет ва разилик булан – Айшат Зиявдиновна Солтанова.
Мычыгъыш Республика, Виноградное юрт.