25-нчи март – Россияны маданият къуллукъчуларыны гюню
Гьар къайсы девюрде де юрт клублар маданиятны отаву болуп гелген. Совет девюрде гьар юртубузну алсакъ да, жанланыв булан иш гёреген маданият къалаланы биналары безей эди.
Бугюнлерде шолай ишлейген маданият къалалар булан кёбюсю юртлар макътанма болмай. Оларда яратывчулукъ иш бирдокъда токъталып къалгъан деп айтма болмайман. Юртларда маданият ожакъны очагъын сёнме къоймай, белсенип айланагъанлар да бар. Шолайлардан мен Бабаюрт райондагъы Геметёбе юртну клубуну ёлбашчысы Сайида Шихмурзаеваны санар эди. Шо пикругъа ону оьзю булан лакъыр этген сонг гелдим.
Сайида маданият тармагъында чалышагъанлы 27 йыл бола. Юрт клубну ёлбашчысыны борчларын бойнуна алгъанлы да йигирма беш йылгъа айлангъан. Ол Магьачкъаладагъы маданият-ярыкъландырыв училищени охуп битдирген. Гиччиден берли чебер кюйде шиъру охумагъа, йыр йырламагъа муштарлы болгъан. Школада оьтгерилеген бары да байрам чараларда ортакъчылыкъ этип юрюген.
Училищени битдирген сонг ата юртуна гелип клубда иш башлай. Шо йылларда мунда халкъ театры да иш гёре болгъан. Ол артистка гьисапда да сагьнада эсде къалар келпетлер яратгъан. Халкъ театр булан бирче Хасавюрт, Буйнакск, Къаягент районлагъа да баргъан ва спектакллерде ортакъчылыкъ этген.
С.Шихмурзаева юртдагъы клубгъа ишге тюшген заманларын эсге ала:
–Шо вакътиде Бабаюрт районну маданият бёлюгюню ёлбашчысы болуп Ималдин Вагьитович Муцалханов ишлей эди,–дей ол мени булангъы лакъырында. –Ишимни биринчи гюнлеринден башлап, ол мени насигьатчым да, ишни сырларына уьйретеген ёлдашым да болуп бажарды. Ону оьзюню ишин бажарагъаны, маданият тармакъны къуллукъчуларына гьайлы янашыву эсимден таймай.
Сайиданы загьмат ёлунда о замангъы юртну башчысы Камил Гьажимусаев де кёмегин болдургъан. Ол Бабаюртдагъы Алим Къурумовну атындагъы халкъ театрны ортакъчысы да болгъан. Йыргъа, бийивге усталыгъы бар адам гьисапда танылгъан.
С.Шихмурзаева бугюнлерде де маданият тармакъда бай сынав топлагъан къуллукъчу гьисапда жагьил касбучулагъа насигьатлар бере ва бажарывлу кюйде оьзю де чалыша. Шону учун да юрт клубу юртлуланы оьзюне тарта. Мунда шатлы мажлислер, байрам чаралар ва оьзге белгили агьвалатлар оьтгериле. Демек, Янгы йылгъа багъышлангъан шатлы ахшамлар, Ватанны якълавчуларына, 8 Март байрамны, Навруз байрамны, Уьстюнлюкню гюню, Ананы гюню, афгъан давну ортакъчыларыны ёлугъувлары, клубда юртлуланы да къуршап, оьр даражада деп айтма ярайгъан кюйде оьтгериле. Юртда бирче 50 йыл яшагъан агьлюлени къуршап «Алтын той» деген гьаракатланы оьтгере туруп да Сайида юртлуларыны гёнгюн ала.
Юрт клубда чебер иш гёреген коллектив 2004-нчю йыл районда биринчи ерни алгъаны да Сайиданы маъналы ва берекетли ишини натижасы болуп токътай. Ол «Ата юртум йырлай» деген маданиятны йылына багъышлангъан фестивальда, «Къысмат ва Ватан – бир» деген патриот йырланы конкурсунда ортакъчылыкъ этип алдынлы ерлеге ес болгъан. «Яшёрюмлер терроргъа къаршы» деген фестивальда ортакъчылыкъ этип, алдынлы ерни алгъан. Республиканы маданият министерлигини грамоталары булан да савгъатлангъан.
Бэлла ГЬАЖИГЕЛДИЕВА,
РФ-ни журналистлерини союзуну члени.
СУРАТДА: С.ШИХМУРЗАЕВА.
