Янгы йылыгъыз къутлу, сыралы болсун!

Гюнлер айлагъа айланып, Янгы йыл оьтген йылны тарихни тархларына теберди. Оьтген йылны ичинде бизин районну, республиканы ва уьлкени яшавунда кёп тюрлю алмашынывлар, сююндюреген, нечакъы сюймесек де, талчыкъдырагъан агьвалатлар да болду.

Шоланы гьали барысын да эсгерип турмай, «Ёлдаш» магъа берген имканлыкъдан пайдаланып, газетни бары да къуллукъчуларын, охувчуларын, анадаш къумукъ халкъымны, айрыча Къарабудагъгент районну халкъын Янгы йыл булан гьакъ юрекден къутлайман. Шону булан бирге, анадаш халкъыма гьар даим алгъа абат алывгъа ругьланыв, парахатлыкъ, яхшы савлукъ, агьлюлерине татывлукъ, берекет-моллукъ, гьар кимни де ишинде оьрлюклер, олай да арты бир де уьзюлмейген кюйде кёп-кёп яхшылыкълар ёрайман.

Янгы йылда гьар ким де янгылыкълагъа, яхшы умутлагъа абат алагъанын гёз алгъа тутуп, юрекге тутгъан бары да асил муратларыгъыз яшавгъа чыгъып гёрмеге сизге насип болсун деп айтмагъа да сюемен. Къой, Янгы йыл бизин учун парахатлыкъны, янгы оьрленивлени, уьстюнлюклени йылы болсун. Бирдагъы да Янгы йылыгъыз къутлу, сыралы болсун!

Къарабудагъгент районну администрациясыны башчысы

Магьмут АМИРАЛИЕВ.