Базар аралыкълар оьмюр сюреген девюрде далапчылыкъ гьаракатда адилли тогъатартывгъа онгайлы шартланы болдурув агьамиятлы. Оьтген йылны экинчи яртысыны гьасиллери шону аян этеми, бизин жамиятда орта мадары булангъы тайпаланы амалгъа геливю рази къалдырамы деген соравлар тувулуна. Дагъыстанны монополиягъа къаршы иш гёрюв булан машгъул болагъан федерал управлениесини (УФАС) Дагъыстан бёлюгюню башчысы Къагьир Бабаев шо гьакъда баянлыкъ бере.
– Гертиден де, базар аралыкъланы девюрюнде далапчылыкъ булан машгъуллуланы ортакъчыларына бирни йимик онгайлы шартланы болдурмагъа тюше. Шолай адилли шартланы болдурмаса, озокъда, тогъатартывда кемчиликлеге ёл бериле. Оьтген йыл далапчылыкъда йиберилген кемчиликлени натижасында законланы бузувлагъа, айрокъда пачалыкъ тапшурувланы пайлавлагъа гёре болгъан арзалагъа гёре гюнагьлыланы уьстюне 31 миллион манатны оьлчевюнде къоду салынды.
Дагъы да ачыкъ этип айтсакъ, 2022-нчи йылны алты айыны ичинде бизин регион управлениени атына тогъатартывну шартлары бузулагъаны саялы гелген 31 арзагъа къаралды. Шоланы арасындан еттиси айыплылары жавапгъа тартылды.
Монополиягъа къаршы законланы бузув республикабызны муниципал къурулувларыны администрацияларында ва энергетика тармакъда кёп къаршылашагъаны гьакъда айрыча эсгермеге тюшедир. Шагьарларда ва районларда топуракъ масъалалагъа байлавлу кемчиликлер кёп йибериле. Ерли муниципал къурулувларында юрт хозяйство агьамияты булангъы топуракъланы ижарагъа берип ишлетивде дыгъарланы шартлары бузулагъаны да разисизликлени тувдура.
Пачалыкъ тапшурувлагъа ес болмакъ учун оьтгерилеген аукционланы, конкурсланы ортакъчыларыны янындан да шартлар бузула. Оьтген йылны артдагъы алты айыны ичинде бизин управлениеде шолагъа байлавлу болуп 972 арзагъа къаралгъан.
Тюзюн айтмагъа герек, шоланы тенг яртысы кюрчюсюз арзалар саялы гьисапгъа алынмады, 106-сын буса оьзлер арзачылар къайтарып алма борчлу болду.
