1 миллион турист къабул этежек. Петербургда оьтгерилген экономика форумгъа гелген Арап Эмират Бирлешивюню президенти (ОАЭ) Мугьаммед бен Заид Аль Нахайян В.Путин булан ёлугъув оьтгерген. Олар эки пачалыкъны арасындагъы бирлешип юрютеген ишлени, сатыв-алывну ва туристлени къабул этивню гьакъында сёйлешивлер оьтгерген.

– Бизин пачалыкъланы арасындагъы дослукъну кюрчюсюн салгъаныгъыз ва шу форумда бизин компаниялагъа ортакъчылыкъ этме ихтияр бергенигиз учун сизге баракалла билдиремен, − деген Мугьаммед бен Заид Аль Нахайян. – Бу йылдан башлап, Россиядан гелеген туристлени къабул этивге де тергев артажакъ.

Сёз ёругъуна гёре айтса, Арап Эмиратда бу йыл бизин уьлкеден 1 миллион турист къабул этме гьазирлик гёрюлген.

Ислам охув ожакълагъа кёмек этме бола

Татарстанда медреселеге ва ислам оьр охув ожакълагъа харж кёмек этме ихтияр берилген. Республиканы муфтиятыны «Закят» деген инсаплы фонду «Медреселеге этилеген яхшылыкъ» деген программа къургъан. Шо гьакъда оьзлени сайтында билдирив этген.

Бугюнге ерли кёмек этмеге деп республикада 8 медресе ва 2 оьр охув ожакъ гёрсетилген.

Гючю бар гьар адам сайтда ерлешген адреслеге гёре акъча йиберме бола. Шо харжны охув ожакъланы оьсювюне, муаллимлени гьалын яхшылашдырма, тарыкъ китаплар алма, охуйгъанланы аш булан таъмин этивге ва ярашдырыв ишлени этмеге къоллама ярай.

Сайтда язылагъан кюйде, шо охув ожакъларда билим алма сюеген къайсы диндеги адам да къабул этиле.