Артдагъы вакътиде яшланы спортгъа байлавгъа айрыча тергев бериле. Спорт тарбия беривню бир бутагъы деп гьисаплана. Янгы къурулагъан школаларда да шону гьисапгъа ала ва къайсы охувчуну не спорт булан машгъул болма гёнгю бар буса да, бары да имканлыкълар болдурула. Шолай да, кёбюсю юртларда спорт идаралар къурула. Бу ерде физкультура дарсланы юрютегенлени агьамияты арта. Яшланы чыныгъыву, айрокъда спортгъа бакъгъан якъдагъы сюювю муаллимден гьасил бола. Ол да ишин сююп этме герек.

Паравулдагъы 2 номерли орта школаны физкультура дарсланы береген Абдулнасир Темирбеков шолайлардан гьисаплана ва бир ерде ишлейгени 30 йыллар бола.

Абдулнасир 1972-нчи йылда Аданакъ юртда тувгъан. Яшдан берли спортгъа гьаваслыгъы бар улан школаны битдиргенде, Магьачкъала шагьардагъы ДГПУ-ну физкультура факультетине тюше. 1997-нчи йылда охуп бите ва Паравулдагъы 2 номерли школада ишлеме башлай. Оьтген заманны ичинде ол кёп яшны спортгъа тарт­ма болгъан. Школаны охувчулары район ва республика ярышларда алдынлы ерлеге ес болгъан. Яшланы тарбиялавда етишген уьстюнлюклери учун ол нечесе керенлер Къарабудагъгент районну билим берив управлениесини ва ДР-ни билим берив министерлигини грамоталары ва дипломлары булан савгъатлангъан.

– Артдагъы йылларда школаларда физкультура дарслагъа айрыча тергев бериле, – дей А.Темирбеков. – Жуманы ичинде физкультура дарслар 3 сагьат юрюле. Олай да класдан тышда шагьмат, теннис, волейбол, футбол, баскетбол, енгил атлетика журалардан секциялар ишлей. Яшланы спортгъа къуршамакъ учун залыбыз ва ону ичинде тарыкъ-герек къураллар бар. Мени булан янаша ишлейген ёлдашларымны да айтма сюемен: школаны муаллимлери Малик ва Сайит­ Валиевлер. Биз онгаргъан яшлар – Къурбанали Валиев (11-нчи клас) – теннисден районну чемпиону, Аминат Гьажигишиева (8-нчи клас) – шагьматдан районну чемпиону, Зулфия Атаева (7-нчи клас) – еринден атылывдан районну чемпиону, Магьамматшапи Балашев ва Рамазан Мукайылов – волейболдан районну алдынлылары.

Яшлагъа билим берив булагъа наслудан-наслугъа геле. А. Темирбековну уьягьлюсю 25 йыл муаллимлик касбуну юрютген. Олай да, ону атасы Абдулмуъмин 50 йылны узагъын­да юртлулагъа билим ва тарбия берген.

Бизин булангъы лакъырда ол оьзюню уланын эсгермей къойду. Ону уланы Расул авур атлетикадан тренер болуп ишлей. Расулну тарбиялавчулары республикадан тышда да алдынлы ва уьстюнлю ерлени къазана.

СУРАТДА: Абдулнасир ТЕМИРБЕКОВ.