Алдагъы гюнлерде Башлыгентде «2023-нчю йылда Дагъыстанны муаллими» деген чара оьтгерилди. Шонда республикада муниципал даражадагъы конкурсланы утгъан 13 муаллим ортакъчылыкъ этдилер.

Эки гюнню узагъында оьр касбучулардан къурулгъан жюри конкурсну ортакъчыларыны билимлерине, сынавуна къыймат бердилер.
Биринчи гюн конкурсну ортакъчылары касбусунда оьзлени методика якъдан топлагъан сынавун, усталыгъын гёрсетдилер. Экинчи гюн муаллимлер жюрини ортакъчыларын да чакъырып, охувчу яшлагъа дарсларын юрютдюлер. Эки де гюнню натижасына гёре ­уьстюнлюк алгъан ва 2-нчи, 3-нчю ерлер къазангъан муаллимлер белгиленди. Биринчи ерге Магьачкъаланы школаларыны орус тилден дарс береген муаллими А.В.Шаулов чыкъды. Ондан сонг 2-нчи ва 3-нчю ерлеге ес болгъан избербашлы муаллим Н.М.Агьматова, табасаран районлу А.Т.Рустамова ва Сергокъала райондан гелген муаллим М.М.Алиева ерлешдилер.

Оьтгерилген гьаракатны гьасиллерин чыгъара туруп, Къаягент районну башчысы Магьаммат Элдерханов, администрацияны билим берив-охутув управлениесини ёлбашчысы Мурат Рашитов, школаны директору Мадина Къадиева чыгъып сёйледилер. Сёйлевлеринде оланы гьариси конкурсну ортакъчыларына уьстюнлюклер ёрадылар.

Конкурсда уьст болгъан муаллимлер ювукъ арада республика даражадагъы уллу конкурсда да ортакъчылыкъ этежек.