Оьтген сонгугюн Хасавюрт районну Ботаюрт ва «Садовое» юртларында бавну инг яхшы бутавчусун сайлайгъан республика оьлчевдеги конкурс оьтгерилди. Конкурсда гьар райондагъы конкурсларда утгъанлар ортакъчылыкъ этди.

Шоланы арасындан да 25 адам сайлангъан эди.

Жюриге башчылыкъ этеген Краснодар крайны Бавчуларыны союзуну председатели Николай Щербаков конкурсну ортакъчыларыны гьаракатына тамаша болду ва ишине оьр багьа берди.
Гьар ортакъчы 50 минутну ичинде 10 терекни бутама герек эди. Жюри тереклени бутавуну сан янына тергев этди.

Натижада биринчи ерни Магьаррамгент ра­йондан гелген Фейзудин Ибрагьимов алды. Экинчи-уьчюнчю ерлени буса Хасавюрт районлу Сахават Агьматов ва Къызлардан гелген Нина Алисолтанова алдылар.
Утгъанлагъа савгъатлар берилди. Хас савгъат буса конкурсну инг де яш ортакъчысы, акъболатюртлу Рамзан Батырбиевге берилди.

Утгъанланы къутлай туруп, Дагъыстанны юрт хозяйство ва сурсат министрини 1-нчи орунбасары Ш. Шарипов шулай конкурс уьлкеде ­биринчилей оьтгерил­гени гьакъда айтды.
–Булай конкурсну оьтгермекни бек уллу маънасы бар, – дей Ш. Шарипов. – Шо Дагъыс­танда бавчулукъгъа тергев барны билдире. Терекни тизив бутама бажарылса, ону тюшюмю де артыкъ бола. Артдагъы йылларда бавчулукъгъа бизин республикада тергев артгъан ва 8 йылны ичинде 10,5 минг гектаргъа бавлар салынгъан. Шолардан 4 минги – янгы къайдада.

Чарада ортакъчылыкъ этген 20 районну юрт хозяйство управ-лениелерини ёлбашчылары да конкурсгъа оьр багьа бердилер ва шунда гёрген къайдаланы районларда къоллама бажарылажагъын да айтдылар.