Белгили экени йимик, фашист елевчюлени къува туруп Берлинге ерли етишген Игитибиз Абдулгьаким Исмайылов − Рейхстаггъа байракъ къакъгъанланы бири. Игит ат да огъар оьзю давдан къайтгъан сонг хыйлы йыллар оьтюп берилди. Асгер ёлдашлары да булан Рейхстаггъа байракъ къакъгъан вакътиде чыкъгъан оланы сураты савлай дюнья­гъа белгили болду.

Ол оьтесиз асил хасияты булангъы сабур, саламат адам эди. Республикабызны жамият яшавунда актив кюйде ортакъчылыкъ этип юрюдю. Жамият болсун, яш наслулар болсун, оьзюню юзлер булангъы ёлугъувларында ол дав агьвалатланы гьакъында хабарлап, патриот ругьда тарбиялавну оьр даражаларын гёрсетди. Ону яшавуну, дав йылларыны гьакъында орусча да, къумукъча да язып белгили шаир ва язывчу Гебек Къонакъбиев китаплар чыгъарды. Биринчи июльда − Игитибизни тувгъан гюню: огъар 107 йыл битежек эди. Шаир Зулейхат Атагишиева огъар багъышлап язгъан шиъруну да охувчуларыбызны тергевюне беребиз.

 

(Абдулгьаким ИСМАЙЫЛОВНУ

тувгъан гюнюне)

Нече къайта яралана къалса да,

Тузлу гёзьяш тамдырмагъан гёзюнден,

Биле гелген Абдулгьаким разведка                                       

Къоччакълыкъны гёзлейгенин оьзюнден.

 

Дав Игити – Дагъыстанны уланы,

Уясында рагьат къоймай итлени,

Рейхстаггъа байракъ къагъып битген сонг,

Парт деп гирген кабинетине Гитлерни.

 

Сав дюньягъа аты болгъан белгили,

Душманланы болмагъандай этгенде,

Абдулгьаким Исмайылов Берлинге

Азатлыкъны гюнюн алып етгенде.

 

Атын язып Рейхстагны тамына,

Къоччакълыкъны ругьун огъар тийдирген,

Кожинкасын, этиклерин Гитлерни

Ёлдашлары тилеп огъар гийдирген…

 

Игит атны гечден де геч алсанг да,

Алтын Юлдуз тёшюнге бек яраша,

Мингсиз таза игитлигинг саялы,

Халкъ айтгъанлай, Абдулгьаким, минг яша!

 

Байракъ къакъгъан Рейхстагны башына,

Гёзюбюзге гёрюнеген тав йимик,

Абдулгьаким Исмайылов Игитни

Халкъ эсинде сакълажакълар сав йимик!